Rasijskaje kiraŭnictva nie padzialaje pazicyju biełaruskich uład pa padaŭleńni hramadstva padčas mirnych akcyj, jakija nie parušajuć zakanadaŭstva Biełarusi.
Pra heta zajaviŭ u intervju BiełaPAN nadzvyčajny i paŭnamocny pasoł Rasijskaj Fiederacyi ŭ Respublicy Biełaruś Alaksandr Surykaŭ.
«My padzialajem punkt hledžańnia Jeŭropy, što dziejańni biełaruskaj dziaržavy byli praźmiernymi paśla 19 śniežnia, — padkreśliŭ dypłamat. — U śviecie niama precedentaŭ, kab šeść kandydataŭ u prezidenty sadzilisia ŭ turmu pa niezrazumiełaj matyviroŭcy, dakładniej, zrazumiełaj: jak by z pryčyny sproby źviaržeńnia ŭłady i niesankcyjanavanych mitynhaŭ.
Vybary — heta zaŭsiody lehalnaja sproba źmieny ŭłady. Ułada pavinna być davoli žorstkaj da parušalnikaŭ zakanadaŭstva, ale ŭłada pavinna ŭmieć i prabačać».
Rasijski pasoł nahadaŭ, što Rasija dałučyłasia da rezalucyi Parłamienckaj asamblei Savieta Jeŭropy, jakaja asudžaje dziejańni biełaruskich uład paśla 19 śniežnia 2010 hoda. «I kali padobnaje pytańnie budzie vyniesiena pa razhonie ŭ Biełarusi apošnich hramadzianskich akcyj, našy pradstaŭniki ŭ mižnarodnych orhanach atrymajuć peŭnyja ŭkazańni», — skazaŭ Surykaŭ.
Ale pry hetym, adznačyŭ jon, Rasija «rezka vystupaje suprać ucisku na Biełaruś, suprać sankcyj da jaje naroda i čaści jaho kiraŭnictva, pryniatych Jeŭrasajuzam i Złučanymi Štatami». «Tamu što kiraŭnictva, sudździ — chaj ich pavodziny nie zaŭsiody adkazvajuć, moža być, demakratyčnym asnovam, ale heta — inšaje pytańnie. Najpierš jany — hramadzianie. I ŭvodzić im vizavyja abmiežavańni nie varta», — pierakanany rasijski pasoł.
Da vyrašeńnia takich kryzisnych situacyj, jak taja, što paŭstała ŭ adnosinach Zachadu ź Biełaruśsiu, «treba ruchacca z abodvuch bakoŭ, razumna». «My padtrymlivali raspačaty ŭ 2007 hodzie dyjałoh pamiž Jeŭropaj i Biełaruśsiu. I škada, što hety dyjałoh razburyŭsia», — adznačyŭ rasijski pasoł.
