U sieradu adbyłasia telefonnaja razmova pamiž prezydentami Biełarusi i Rasiei. Jak zaznačaje biełaruskaje infarmacyjnaje ahienctva BIEŁTA, razmova miž Pucinym i Łukašenkam była praciahłaj, i «padčas jaje byli abmierkavanyja prablemy, što skłalisia va ŭzajemaadnosinach dvuch dziaržaŭ u handlova‑ekanamičnaj sfery»
Havorka, u pryvatnaści, u zabiaśpiečańni Biełarusi enerharesursami, a taksama ab pastaŭkach vuhlevadarodnaj syraviny ŭ krainy Eŭropy. U vyniku hutarki i byŭ znojdzieny kampramis, padkreślivaje BIEŁTA, jaki «dazvolić razblakavać najaŭnuju sytuacyju, u tym liku tuju, što tyčycca tranzytu nafty ŭ krainy Eŭropy cieraź Biełaruś».
Zusim u inšaj tanalnaści vytrymanaje paviedamleńnie rasiejskaha dziaržaŭnaha ahienctva ITAR-TASS. U im niama nijakaj kankretyki, adno zaznačajecca, što razmova adbyłasia pa inicyjatyvie biełaruskaha boku. Havorycca, što premjer‑ministram Biełarusi i Rasiei daručana ciaham dvuch dzion vypracavać kankretnyja prapanovy pa vyrašeńni prablemnych pytańniaŭ.
Nieadkładna paśla telefonnaj razmovy prezydentaŭ biełaruski ŭrad paviedamiŭ pra rašeńnie admianić myty na tranzyt nafty, uviedzienyja šeść dzion tamu. A rasiejskaja "Tranśniefť" abvieściła pra hatoŭnaść adnavić pastaŭki nafty va Ŭschodniuju Eŭropu praz naftapravod "Družba", spynienych u paniadziełak. Pakul niajasna hałoŭnaje: pa jakoj canie budzie pastaŭlacca ŭ Biełaruś rasiejskaja nafta.
Siarhiej Sidorski paviedamiŭ, što zaŭtra jon maje vylecieć u Maskvu dla sustrečy z rasiejskim premjeram.
Takim čynam, biełaruskija myty pratrymalisia roŭna pakul u Rasiei doŭžylisia kaladnyja vakacyi.
❏
Maskva patrabuje ad Mienska viarnuć 80 tys. ton nafty.
Rasieja hatova adnavić prapampoŭvańnie nafty ŭ mahistralnym trubaprovadzie «Družba», kali Biełaruś «viernie» zabranuju rasiejskuju syravinu šlacham prapampoŭvańnia hetaj nafty ŭ Eŭropu, zajaviŭ namieśnik kiraŭnika rasiejskaha Minekanamraźvićcia Andrej Šaronaŭ. Raniej urad Biełarusi admianiŭ pošliny nafty, uviadzieńnie jakich stała pryčynaj spynieńnia jaje prapampoŭvańnia pa «Družbie» ŭ Zachodniuju Eŭropu.
Šaronaŭ skazaŭ, što Rasieja patrabuje viarnuć kala 80 tys. ton nafty, «zabranych» Biełaruśsiu ŭ košt upłaty pošlin , ź jakimi nia zhodnaja Maskva. «Jana (Biełaruś) mahła b pačać transpartoŭku hetaj nafty. Heta prykładna čatyry hadziny paŭnacennaj pracy. Za hety čas «Tranśniefť» moža padrychtavacca da adnaŭleńnia prapampoŭvańnia nafty z terytoryi Rasiei, ‑ zajaviŭ namieśnik ministra.
❏
Jak paviedamiła Biełaruskaja słužba radyjo "Svaboda", apoŭnačy adbyŭsia pusk nafty pa biełaruskim učastku naftapravoda “Družba” ŭ kirunku Ukrainy i Polščy.
Rasiejski bok nastojvaŭ na tym, kab pieršymi byli padadzienyja ŭ Eŭropu 80 tysiač ton nafty, jakija biełaruki bok z 6 da 8 studzienia skanfiskavaŭ dziela apłaty tranzytnaha myta, ciapier užo skasavanaha.
Da kanca sierady na pradpryjemstvie “Homieltransnafta” čakali zahadu ź Miensku z kancernu “Biełnaftachim” i dakumentaŭ z rasiejskaj kampanii “Tranśniefť”. U “Tranśniefci” čakali telehramu ź Biełarusi, jakaja b harantavała biaśpiečny tranzyt nafty biez usialakich umovaŭ.
Kala poŭnačy Biełaruś pačała prapampoŭvać 80 tys. ton. Heta zaniało 8 hadzinaŭ. Kala 8.00 Rasieja adnaviła padaču čornaje syraviny ŭ naftapravod "Družba".
Fota z sajtu ITAR-TASS
