25 žniŭnia 1991 h. 5-ja niečarhovaja siesija Viarchoŭnaha Savieta BSSR pryniała zakon «Ab nadańni statusu kanstytucyjnaha zakonu Dekłaracyi Viarchoŭnaha Savieta BSSR ab dziaržaŭnym suvierenitecie Biełaruskaj Savieckaj Sacyjalistyčnaj Respubliki» i pastanovu «Ab zabieśpiačeńni palityčnaj i ekanamičnaj samastojnaści Biełaruskaj SSR».
Tym samym faktyčna była abvieščana niezaležnaść BSSR. U tyja samyja dni realnaje kiraŭnictva krainaj pierajšło ad CK Kampartyi da orhanaŭ zakanadaŭčaj i vykanaŭčaj ułady.
Paśla stahodździaŭ kałanijalnaj zaležnaści Biełaruś pačała pieratvareńnie ŭ paŭnapraŭny subjekt mižnarodnaha prava. Jana ŭpieršyniu stała ŭłaśnicaj usioj majomaści, jakaja znachodziłasia na jaje terytoryi.
Jak padkreślivaje ŭ svajoj knizie «Siem hadoŭ adradžeńnia…» adzin z aŭtaraŭ Akta niezaležnaści Siarhiej Navumčyk, suprać nadańnia Dekłaracyi ad dziaržaŭnym suvierenitecie statusu kanstytucyjnaha akta vystupiŭ deputat Łukašenka.
Taja siesija adbyvałasia na treci paśla pravału putču HKČP dzień i prachodziła dosyć burna.
24 žniŭnia BNF vyvieŭ na płošču Lenina dziasiatki tysiač ludziej, a ŭ zału, dzie adbyvalisia pasiadžeńni, Valancinam Hołubievym, Zianonam Paźniakom i Halinaj Siamdzianavaj byŭ uniesieny bieł-čyrvona-bieły ściah,
a potym deputaty ad frakcyi BNF nie dapuścili da trybuny hałoŭnaha kamunista Biełarusi Anatola Małafiejeva.
25 žniŭnia staršynia Viarchoŭnaha Savieta BSSR Mikałaj Dziemianciej padaŭ u adstaŭku, pieršym kiraŭnikom niezaležnaj Biełarusi staŭ Stanisłaŭ Šuškievič, što dahetul zajmaŭ pasadu namieśnika staršyni.
19 vieraśnia 1991 h. siesija Viarchoŭnaha Savieta pryniała rašeńnie nazyvać BSSR nadalej Respublika Biełaruś, u skaročanych nazvach – Biełaruś.
Tady ž była pryniata pastanova Viarchoŭnaha Savieta ab dziaržaŭnych simvałach. Dziaržaŭnym ściaham abviaščaŭsia bieł-čyrvona-bieły ściah, hierbam – «Pahonia».
Biełarusy pačali pa-inšamu canić svaju historyju i svajo nacyjanalnaje "ia".Heta była revalucyjnaja pieramiena ŭ žyćci nacyi.
