Hrupa biełaruskich čynoŭnikaŭ na čale sa staršynioj praŭleńnia Nacyjanalnaha banka Nadziejaj Jermakovaj nakiroŭvajecca ŭ Vašynhton. Takoje rašeńnie zaćvierdžana pastanovaj Savieta ministraŭ № 1227 ad 15 vieraśnia, jakoje apublikavana na Nacyjanalnym pravavym partale.
U skład delehacyi ŭvajšli: ministr ekanomiki Mikałaj Snapkoŭ, ministr finansaŭ Andrej Charkaviec, načalnik hałoŭnaha ŭpraŭleńnia źniešnieekanamičnaj dziejnaści Nacbanka Alaksiej Lasnoj, namieśnik načalnika hałoŭnaha ŭpraŭleńnia mižnarodnaha supracoŭnictva i handlu, načalnik upraŭleńnia źniešnieekanamičnaj dziejnaści Aparatu Savieta ministraŭ Hienadź Miadźviedzieŭ. Kamandziroŭka praciahniecca z 21 pa 25 vieraśnia.
Meta kamandziroŭki ŭ dakumiencie ŭ adkrytym dostupie nie pakazanaja.
Razam z tym viadoma, što ŭ hetyja dni ŭ Vašynhtonie adbudziecca štohadovy schod kiraŭnikoŭ Mižnarodnaha valutnaha fondu i Suśvietnaha banka.
Urad i Nacbank Biełarusi raźličvajuć na novuju prahramu kredytnaha supracoŭnictva z MVF.«Jak miarkujecca, vyznačałasia suma kredytu ŭ 5–8 miljardaŭ dalaraŭ. Ale, mahčyma, nam takija hrošy i nie spatrebiacca. Heta budzie zaležać ad taho, jak MVF acenić našy dziejańni», — zajaviła Jermakova 17 vieraśnia, dadaŭšy, što fond užo ŭchvaliŭ apošnija dziejańni ŭrada pa vychadzie na adziny kurs.
