Šeść hod tamu žerabia «Dažynak» vypała Słucku. U kastryčniku 2005 hoda amierykanskija dypłamaty vypravilisia tudy, kab acanić maštab i jakaść pryhatavańniaŭ da śviata, jakija, pavodle telehramy, kaštavali amal 57 młn dalaraŭ.
Praz usiu pajezdku dypłamataŭ supravadžaŭ «Karavan milicejskich, žurnalisckich i KDBšnych mašyn», paviedamlajecca ŭ telehramie.
Amierykancy zahadzia damoviłsia z staršyniom vykanaŭčaha kamiteta Alaksandram Drako na maleńkuju zakrytuju sustreču. Ale na ich ździŭleńnie, u ofisie Drako dypłamataŭ sustreli žurnalisty kanała STV i miascovych dziaržaŭnych vydańniaŭ. Kali ž amierykancy hetamu zapiarečyli, to pamočnik Drako ŭśmichnuŭsia i hučna pramoviŭ: «Jak ža my budziem rekłamavać pryjezd dypłamataŭ u naš horad bieź videasustrečy? My nie majem nijakich sakretaŭ!»
Vybačyŭšysia, dypłamaty pakinuli budynak pad supravadžeńnie kamiery STV.
Sustreču z pradstaŭnikami miascovaj apazicyi taksama vymušana skasavali
«Jaŭnaj metaj žurnalistaŭ, milicyi i ideołahaŭ było prymusić dypłamataŭ niervavacca i pieraškodzić ich sustrečam.
Supracoŭnikaŭ ambasady supravadžali i ŭ raniejšyja pajezdki pa rehijonach, ale taki maštab uvahi byŭ upieršyniu», piša Džordž Kroł.
Zatoje ŭdałosia sustrecca z redaktarami miascovych vydańniaŭ i hrupaj abarony pravoŭ spažyŭcoŭ.
Amierykancy daviedalisia, što časta renavacyja ŭklučaje tolki ramont fasadaŭ i bačnaj infrastruktury, a nie nieabchodnyja ŭnutranyja pracy.
Redaktary Andrej Kadrenka (časopis «Kapitał») i Siarhiej Stankievič (hazieta «Kurjer») na pytańni dypłamataŭ ZŠA adkazvali nieachvotna i staŭleńnie ich było «prynamsi varožym i hrubym».
Ale pryjemna ŭraziła arhanizacyja pa abaronie pravoŭ spažyŭcoŭ na čale ź Iharam Hubanavym.
«Arhanizacyja žyvie za košt unioskaŭ klijentaŭ, tamu hrošaj nie chapaje. Nichto z supracoŭnikaŭ nie maje zarobku ŭžo 2 miesiacy i ciapier dumajuć, jak zapłacić za aciapleńnie. Ale arhanizacyja praciahvaje dziejnaść i dzivosna pieramahaje ŭ 95% sudoŭ»
Na momant vizitu dypłamataŭ svajoj čarhi čakali try pozvy, źviazanyja z maštabnymi renavacyjami da Dažynak.
«Čynoŭniki addavali zahady na praviadzieńnie pracaŭ, nie zvažajučy na majomaść žycharoŭ i ich žyllovyja ŭmovy. Dachi zryvali i nie zaściłali, tamu ŭ damach utvaraŭsia patop, i heta nie kampiensavali. Pracoŭnyja nieachajna łamali pryvatnuju majomaść, vakonnaje škło, sprabujučy na skoruju ruku zrabić kaśmietyčny ramont horada», — apisvaje telehrama.
Milicyja i miascovy hałoŭny ideołah u mašynie KDB supravadžali dypłamataŭ daloka za horadam.
«La prydarožnaha restarana my spynilisia, kab spytać u čałavieka na darozie, dzie nabyć kavuny.
Nie paśpieŭ jon skončyć svoj skaz, jak tut ža pobač spyniŭsia milicejski aŭtamabil, i jaho paklikali na maleńkuju razmovu», —pieradaje detali pajezdki telehrama.
Padazreńni, što dažynačnaja renavacyja horada ŭ lepšym vypadku — štučnaja, paćvierdzilisia, prychodziać da vysnovy zamiežnyja dypłamaty.
