Heta vynikaje z vystupu kiraŭnika Nacbanka Nadziei Jermakovaj na siesii savieta respubliki 3 kastryčnika.
Jermakova nahadała, što ciapier staŭka refinansavańnia składaje 30%, adnak «jana pavinna być krychu vyšejšaj abo choć by pobač ź inflacyjaj».
Pavodle jaje słoŭ, u pieršaj dekadzie kastryčnika źjavicca statystyčnaja infarmacyja i Nacbank razam z uradam budzie vyrašać pavyšać ci nie staŭku refinansavańnia.
«U pryncypie, jana (staŭka refinansavańnia) užo siońnia pierastała adyhryvać svaju rolu, tamu što pracenty pa ŭkładach nasielnictva ŭžo našmat vyšejšyja — dasiahajuć 40–45 pracentaŭ. Kredyty taksama ŭžo dasiahajuć 40 pracentaŭ. Tamu kali i pavyšać satŭku refinansavańnia, to jana nie dasiahnie inflacyi. Tamu što kali zrabić jaje 80 pracentaŭ, to my možam praktyčna spynić usiu ekanomiku. Heta značyć u peŭny pieryjad staŭka refinansavańnia ŭžo nie spracoŭvaje», — skazała Jermakova.
Pytańnie, ci treba jaje pavialičvać, abmiarkoŭvajecca. Ad hetaha, jak adznačyła Jermakova, zaležyć pracent, pad jaki Nacbank budzie padmacoŭvać kamiercyjnyja banki standartnymi instrumientami.
Jermakova paviedamiła, što Nacbank štodzionna kredytuje Biełaruśbank i Biełahraprambank u pamiery 3,5–4 trłn. rubloŭ pad staŭku 40 pracentaŭ. «Tak my možam razaryć banki i stracić ekanomiku. Popyt na kredyty z boku pradpryjemstvaŭ źniziŭsia, ale pakul mała», — kanstatuje kiraŭnik Nacbanka.
