U Minsku zdymajecca pieršy moładzievy sieryjał ź biełaruskaj movaj 7

Siońnia ŭ Minsku pačalisia zdymki moładzievaha sieryjała pra biełaruskuju muzyku, krainu i ŚNID. U ich voźmuć udzieł viadomyja muzyki, aktory i spartoŭcy, u tym liku repier Vinsent, lidar «J: Mors» Uładzimir Puhač, šoumen Jaŭhien Bułka, znakamityja spartsmienki Alaksandra Hierasimienia i Darja Domračava.

Vinsent

Kastynh da sieryjała pryciahnuŭ kala 1,5 tys. achvotnych źniacca ŭ kino.

8-sieryjny film «Vyšej za nieba», jaki zdymajuć u Minsku na hrant Hłabalnaha fondu dla baraćby sa ŚNIDam, suchotami i malaryjaj AAN, musić, jak miarkujuć aŭtary, stać kultavym siarod pakaleńnia Y. U jakaści dadatkovaj fiški sieryjała aŭtary vykarystajuć dvuchmoŭje hierojaŭ: razmaŭlać u filmie buduć jak pa-biełarusku, tak i pa-rasijsku.

Za dva miesiacy da pačatku zdymak arhanizatary, siarod jakich dramaturh i kreatyŭny pradusar stužki Andrej Kurejčyk, jon ža scenaryst, praviali kastynh achvotnych uziać udzieł u kinapracesie.

Takich znajšłosia kala 1,5 tysiačy prafiesijnych i nie nadta aktoraŭ, tamu adbor vyklikaŭ peŭnyja ciažkaści, i pačatak zdymak adkłali.

Siońnia ž u Minsku la ofisa arhanizacyi, što zajmajecca baraćboj za ŚNIDam, raspačalisia niepasrednyja zdymki «Vyšej za nieba». U pieršy dzień u ich biaruć udzieł, jak piša BiełTA, «papularnyja ŭ moładzievym asiarodku» repier Vinsent, šoumen Bułka i śpiavak Puhač.

Jak paviedamlałasia raniej, u sieryjale buduć hrać taksama viadomyja spartsmienki: płyŭčycha Alaksandra Hierasimienia, bijatłanistka Darja Domračava i himnastka Mialita Staniuta. Zrešty, apošniaja čutki pra svoj udzieł nie paćvierdziła: jaje trenier Iryna Laparskaja zajaviła «Spartovaj panaramie», što da skančeńnia karjery Staniuta «nie budzie zdymacca ni ŭ jakim filmie biez zhody hałoŭnaha treniera».

A voś Alaksandra Hierasimienia ŭžo adkryta kaža pra svoj udzieł. Pavodle jaje słovaŭ, płyŭčycha hraje «rolu siabroŭki hałoŭnaj hieraini, jakaja stavić jaje na praŭdzivy šlach.

«Ihraju samu siabie — płyŭčychu Alaksandru Hierasimieniu. Ščyra kažučy, da hetaha času nie pračytała scenar. Praz zatrymki pakul usio adkładajecca», — skazała pieramožca apošniaha čempijanatu śvietu za niekalki dzion da pačatku zdymak.

Pra što film

Aŭtary tak padajuć siužet «Vyšej za nieba»:

«Hałoŭny hieroj — lidar modnaha hurta Mikita Mickievič. Mikita charyzmatyčny, razumny, žyvie pavodle svaich pryncypaŭ i nie hatovy imi achviaravać dziela hrošaj. Jon śmieły i stylovy — sapraŭdnaja ikona dla dziaŭčatak i ŭzor dla chłopcaŭ.

Mikita atrymlivaje zadavalnieńnie ad svajho žyćcia i viedaje, što hety śviet vydatny. Mikita zmahajecca za lidarstva z vakalistam jaho hurta Stasikam, jaki ŭjaviŭ siabie „zorkaj“. Hurt bolej na baku Mikity. Ale tut adbyvajecca padzieja, jakaja pieravaročvaje ŭsio jahonaje žyćcio».

Hieroi sieryjała buduć razmaŭlać i pa-biełarusku, i pa-rasijsku. Pavodle słovaŭ aŭtaraŭ, taki pryjom «upieršyniu vykarystany» ŭ sieryjale, kab maksimalna nablizić film da biełaruskich realij.

Premjera sieryjała adbudziecca 14 lutaha 2012.

0

0

0

0

0

0

generation.by

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH