Na sudovym pracesie pa spravie Dźmitryja Kanavałava i Uładzisłava Kavalova 11 kastryčnika śviedki — paciarpiełyja ad vybuchu ŭ Viciebsku ŭ 2005 hodzie — zajavili, što ŭ milicyi spačatku nie vieryli ŭ paviedamleńni ab vybuchu i na miescy złačynstva dziejničali maradziory.
U pryvatnaści, jak raskazaŭ Ihar Fiadosienka (jon atrymaŭ ranieńni padčas vybuchu 14 vieraśnia 2005 hoda na prypynku kala Letniaha amfiteatra ŭ abłasnym centry), žančyna, što akazvała jamu pieršuju dapamohu, sprabavała vyklikać milicyju. «U milicyi nie pavieryli, stali łajacca», — skazaŭ Fiadosienka. Paśla hetaha žančyna vyklikała chutkuju dapamohu.
Pryčynieny jamu na toj momant materyjalny ŭron Fiadosienka acaniŭ u 200 tysiač rubloŭ. Viciebski harvykankam vypłaciŭ hetyja hrošy, tamu ciapier paciarpieły materyjalnych pretenzij nie maje.
Akramia Fiadosienki ŭ vyniku vybuchu paciarpieła jašče adna žančyna.
Pra fakt maradziorstva padčas druhoha vybuchu ŭ Viciebsku, 22 vieraśnia 2005 hoda, u sudzie paviedamiła paciarpiełaja Julija Čarkoŭskaja, jakaja atrymała skraznoje askołačnaje ranieńnie. Pavodle słoŭ Čarkoŭskaj, niejkija chłopcy padchapili jaje pad ruki, jana pieradała svaju sumku siabroŭcy, i ŭ hety momant sumku sprabavaŭ chtości ŭkraści. Materyjalny ŭron z ulikam ciapierašnich cen śviedka acaniła prykładna ŭ miljon rubloŭ.
