Viertalot AS-355NP «Ecureuil». Fota gpk.gov.by
Malunak www.eurocopter.ru
20 kastryčnika kala 15.45 u rajonie vioski Vilejty Pastaŭskaha rajona Viciebskaj vobłaści prykładna ŭ kiłamietry ad biełaruska-litoŭskaj miažy raźbiŭsia viertalot Pamiežnaha kamiteta Biełarusi, paviedamlaje BiełaPAN.
Na borcie znachodzilisia dva člena ekipaža i zdymačnaja hrupa Teleradyjoviaščalnaj arhanizacyi Sajuznaj dziaržavy (TRA «Sajuz») — usiaho piać čałaviek.
Zahinułyja žurnalisty — Julija Šaternik (28 hod), Vital Pračkoŭski (36), Siarhiej Šamałaŭ (39), jakija rabili śpiecyjalny repartaž ź miažy.
Viertalot vykonvaŭ płanavy palot pa achovie dziaržaŭnaj miažy.
Pa fakcie katastrofy stvorana śpiecyjalnaja kamisija, na miesca krušeńnia vyjechaŭ staršynia Dziaržaŭnaha pamiežnaha kamiteta Ihar Račkoŭski, paviedamlaje BiełTA. Pavodle infarmacyi śviedkaŭ, u momant krušeńnia byŭ bačny mocny dym. U rajonie zdareńnia pavietranuju prastoru patrulavaŭ jašče adzin viertalot.
***
Videarolik pra trenirovačnyja paloty na novych francuzskich viertalotach, leta 2010 hoda.
Pieršy viertalot AS-355NP «Ecureuil» francuzskaj kampanii «Jeŭrakopter» Pamiežny kamitet Biełarusi nabyŭ u červieni 2009 hoda. Ciaham 2010 hoda Biełaruś nabyła jašče try viertaloty hetaj firmy. «Francuzy» bazujucca ŭ asobnym avijacyjnym atradzie Pamiežnaha kamiteta ŭ Pastavach. Hetyja viertaloty značna tańniejšyja za anałahičnyja rasijskija varyjanty, a raschod paliva ŭ čatyry razy mienšy, čym u Mi-8, jakija taksama vykarystoŭvajucca biełaruskimi pamiežnikami.
***
Viertalot AS-355NP «Ecureuil» francuzskaj kampanii «Jeŭrakopter» asnaščany 2 ruchavikami, dziakujučy čamu jon siertyfikavany pa katehoryi A. Viertaloty hetaj katehoryi mohuć praciahvać nabor vyšyni i haryzantalny palot navat u vypadku admovy adnaho z ruchavikoŭ. Sieryfikacyja pa katehoryi A źjaŭlajecca abaviazkovaj dla palotaŭ nad haradmi ŭ krainach Jeŭropy, a taksama Rasii.
Dziakujučy najaŭnaści dvuch ruchavikoŭ i aŭtapiłota viertalot moža być abstalavany avijajonikaj dla palotaŭ pa praviłach prybornaha palota.
U pasažyrskaj kabinie mohuć raźmiaścicca ad 3 da 6 pasažyraŭ.
Taktyka-techničnyja charaktarystyki AS-355NP «Ecureuil»
Maksimalnaja ŭźlotnaja vaha — 2,6 t
Siaredni raschod paliva — 182 kh/h
Dalečynia palotu — 731 km
Maksimalnaja chutkaść — 278 km/h
Maksimalnaja vyšynia palotu — 6100 m
Maksimalnaja praciahłaść palotu — 4 h. 35 chv.
Daŭžynia fiuzielaža —10,93 m
Vyšynia fiuzielaža — 3,14 m
Šyrynia fiuzielaža — 1,78 m
Dyjamietr asnoŭnaha šruba — 10,69 m
Dyjamietr chvastavoha šruba — 1,86 m.
***
Katastrofy «Jeŭrakoptaraŭ»
Apošniaja zdaryłasia 3 miesiacy tamu ŭ Aŭstralii. Tady taksama zahinuli žurnalisty.
Viertaloty francuzkaj kampanii «Jeŭrakopter» — adny z samych papularnych u śviecie. Ale heta, na žal, nie ratuje ich ad katastrofaŭ.
22 kastryčnika 1996 u Vialikabrytanii raźbiŭsia AS355 Squirrel F1. U katastrofie zahinuli 6 čłaviek, u tym liku i vice-prezident futbolnaha kłuba «Čełsi» Mećju Chardynh. A 3 maja 2007 u katastrofie viertalota Twin Squirrel kampanii «Jeŭrakopter» zahinuŭ sponsar «Čełsi» Filip Karter. Razam ź im zahinuli jaho syn, siabar i piłot.
26 lipienia 1998 u Vialikabrytanii raźbiŭsia viertalot chutkaj dapamohi, jaki lacieŭ pa vykliku na DTZ. 3 čałavieki zahinuli.
27 śniežnia 2007 u Prymorskim krai Rasii paciarpieŭ katastrofu viertalot AS-350V3. Zahinuli piłot i pasažyr.
19 žniŭnia 2011 try čałavieki zahinuli ŭ vyniku katastrofy viertalota AS-355F-2 u Aŭstralii. Dvoje ź ich byli žurnalistami radyjaviaščalnaj karparacyi AVS.
