Žoncyvice-prezidenta Mižnarodnaj fiederacyi pravoŭ čałavieka Alesia Bialackaha Natalli admoŭlena ŭ spatkańni z mužam, paviedamiŭ kaleha Bialackaha, pravaabaronca Valancin Stefanovič.
Jon adznačyŭ, što heta ŭžo nie pieršaja admova ŭ spatkańni Bialackaha sa svajakami. «Raniej, na etapie papiaredniaha śledstva, u spatkańni admaŭlali orhany śledstva. Kali sprava pieradajecca ŭ sud, spatkańni maje prava dazvolić sudździa. Adnak 27 kastryčnika Natalli paviedamili, što sudździa suda Pieršamajskaha rajona Minska Siarhiej Bandarenka, jaki budzie vieści praces nad Bialackim, admoviŭ joj u spatkańni», — skazaŭ Stefanovič.
Takim čynam, Bialacki nie bačyŭsia sa svaimi rodnymi z momantu zatrymańnia 4 žniŭnia.
Jak skazaŭ pravaabaronca, vypadki dazvołu spatkańniaŭ sa svajakami na etapie śledstva abo pierad pačatkam pracesu ŭ Biełarusi «nadzvyčaj redkija». «Dazvoł na spatkańnie bolš realna atrymać paśla vyniasieńnia pryhavoru sudom pieršaj instancyi: pamiž pryhavoram i razhladam kasacyjnaj skarhi», — adznačyŭ Stefanovič.
Bialacki znachodzicca pad aryštam z 4 žniŭnia.Jamu vystaŭlena abvinavačańnie na padstavie častki 2 artykuła 243 Kryminalnaha kodeksa (utojvańnie dachodaŭ u asabliva bujnym pamiery). Padstavaj dla kryminalnaha pieraśledu pravaabaroncy stała infarmacyja pra jaho rachunki ŭ zamiežnych bankach, pieradadzienaja biełaruskim uładam Miniustam Litvy i Hienprakuraturaj Polščy. Ułady hetych krain publična prynieśli prabačeńni Bialackamu i jaho rodnym, a taksama prypynili kantakty ź Biełaruśsiu ŭ miežach dahavoraŭ ab pravavoj dapamozie. Vyzvaleńnia Alesia Bialackaha patrabujuć mižnarodnyja pravaabarončyja struktury, kiraŭnictva Jeŭrasajuza, ZŠA i šerahu inšych demakratyčnych krain.
Sud nad Bialackim pačniecca 2 listapada.Sudzić jaho budzie sudździa suda Pieršamajskaha rajona Minska Siarhiej Bandarenka, a sam praces budzie prachodzić u budynku suda Maskoŭskaha rajona.
0
0
0
0
0
0
