Najšoŭšy film Haliny Adamovič «Dzień paminańnia» raspaviadaje pra niekali vialikuju i pryhožuju viosku Budzišča, što na miažy Biełarusi i Rasii. Paśla avaryi na Čarnobylskaj AES amal usie žychary vioski byli adsieleny. Niekalki starych dy chvory chłopiec Alaksiej Pryvałovič sa svaimi baćkami, zastalisia žyć ŭ Budziščach. Prahažość pryrody, kałaryt miascovych žycharoŭ, najaŭnaść śviatoj krynicy začaravali japonskich kinadakumientalistaŭ, vypadkova zavitaŭšych u 2001 hodzie ŭ viosku. Japonski režysior Siejšy Matachašy zrabiŭ niekalki vialikich filmaŭ pra Budzišča (samy viadomy i ŭšanavany — «Alaksiej i krynica»). Niedzie ŭ 2005 hodzie pryjechali japoncy znoŭ u Budzišča i pachavali niešta pad staroj hrušaj, la krynicy. Z taho času isnuje ŭ vioscy lehienda, što pad hruškaj pachavali prach japonskaha režysiora, jakomu tak spadabałasia biełaruskaja vioska... Tolki na Radunicu źbirajucca byłyja viaskoŭcy ŭ Budzišča: uparadkavać rodnyja mahiły, pahladzieć adzin na adnaho, nahadać «jak japoncy kino zdymali». Žyćcio pacichu uciakaje z hetaha miesca. Vielmi chutka zdymać tut možna budzie tolki viry ŭ krynicy.
