Biez revalucyi 1917 hoda nie było b Biełarusi. Takuju dumku vykazaŭ u hutarcy z žurnalistami lidar Biełaruskaj partyi levych «Spraviadlivy śviet» Siarhiej Kalakinpaśla ŭskładańnia kvietak da pomnika Leninu na płoščy Niezaležnaści ŭ Minsku 7 listapada.
«Siońnia my adznačajem vialiki dzień, jaki zasnavaŭ našu biełaruskuju dziaržavu.
Kali b nie było revalucyi, my b žyli ŭ Rasii», — miarkuje Kalakin. Pavodle jaho słoŭ, u 1917 hodzie «była sproba ludziej zrabić svajo žyćcio lepšym». «Nam treba z pavahaj stavicca da ich učynkaŭ, chacia jany i nie zmahli ažyćciavić usio zadumanaje», — zaznačyŭ lidar partyi.
Lenina Kalakin nazvaŭ «najvialikšym čałaviekam». Na jaho dumku, toje, pra što maryŭ Lenin, abaviazkova ździejśnicca ŭ budučyni.
Pa prośbie žurnalistaŭ Kalakin prakamientavaŭ zroblenyja hadzinaj raniej tut ža, kala pomnika Leninu, zajavy členaŭ Kamunistyčnaj partyi Biełarusi (KPB) pra toje, što mienavita ŭ Biełarusi siońnia realizujucca pryncypy roŭnaści i svabody, abvieščanyja padčas Kastryčnickaj revalucyi. Na dumku lidara partyi «Spraviadlivy śviet», siońnia ŭ biełaruskim hramadstvie niama ni roŭnaści, ni salidarnaści. «Hramadstva zaraz raździelena. Tolki kali ŭłada i narod buduć adzinyja, my zmožam ruchacca napierad. Upeŭnieny, što bolšaść biełarusaŭ chacieli b źmianić svajo žyćcio. Chacia pakul jany jašče nie pieraadoleli svoj strach», — miarkuje Kalakin.
Va ŭskładańni kvietak da pomnika Leninu brali ŭdzieł kala čatyroch dziasiatkaŭ aktyvistaŭ partyi levych «Spraviadlivy śviet».Paśla cyrymonii da Kalakina padyšoŭ supracoŭnik milicyi i prapanavaŭ jamu 8 listapada ŭ 10.00 naviedać upraŭleńnie ŭnutranych spraŭ Maskoŭskaha rajona stalicy (na terytoryi hetaha rajona raźmieščana płošča Niezaležnaści). Lidar partyi ličyć, što jamu mohuć vystavić pretenzii ŭ parušeńni zakanadaŭstva ab praviadzieńni masavych mierapryjemstvaŭ. U suviazi z hetym Kalakin padkreśliŭ, što ni mitynhaŭ, ni šeściaŭ členy partyi nie pravodzili — prosta ŭskłali kvietki da pomnika. Tym nie mienš palityk maje namier schadzić u RUUS.
Varta zaznačyć, što kvietki da pomnika Leninu siońnia ŭskładali try hrupy pradstaŭnikoŭ biełaruskich levych. Aprača členaŭ KPB i «Spraviadlivaha śvietu» kvietki ŭskłali prykładna dva dziasiatki pažyłych ludziej, jakija nieśli ściah ź simvolikaj UKPB (Usiesajuznaj kamunistyčnaj partyi balšavikoŭ) i partrety Stalina. Jany nijak nie nazyvali siabie, ale, chutčej za ŭsio, heta byli aktyvisty hramadskaha abjadnańnia «Za Sajuz i Kamunistyčnuju partyju Sajuza» (SKPS).
Niahledziačy na toje što akcyju na płoščy Niezaležnaści pravodzili roznyja hrupy, milicyja zacikaviłasia tolki dziejańniami apazicyjnaj partyi «Spraviadlivy śviet».
