Zaŭtra, 3 lutaha, u italjanskim haradku Antcholc pačynajecca čempijanat śvietu pa bijatlonie, jaki praciahniecca da 11 lutaha, padčas jakoha budzie razyhrana 11 kamplektaŭ uznaharod. Piać u mužčynaŭ, piać u žančynaŭ i adna ŭ źmiešanaj estafecie. Antcholc raźmieščany na poŭnačy Italii ŭ Paŭdniovaj Tyrolii, horad maje taksama druhuju nazvu — Anterselva. Italjanskaje miesta ŭžo piaty raz prymaje padobnyja spabornictvy.
Niedachopu śniehu ŭ Italii zaraz niama, tamu bijatlanisty buduć spaborničać tolki adzin z adnym, a nie z pryrodnymi kataklizmami, jak niaredka byvała na sioletnich etapach kubku śvietu.
Biełaruskim spartoŭcam budzie ciažka zmahacca za medali na hetym pieršynstvie. U zbornaj adbyvajecca źmiena pakaleńniaŭ. Asabliva baluča hety praces prachodzić u mužčynskaj kamandzie. Letam sa sportu syšli aksakały, nieadnarazovyja pryzery čempijanataŭ i kubkaŭ śvietu – Aleh Ryžankoŭ, Uładzimier Dračoŭ i Vadzim Sašuryn. U zbornuju Ŭkrainy pierajechaŭ bronzavy pryzer Alimpijady‑1998 u Nahana Alaksiej Ajdaraŭ. Što praŭda, i ŭ kamandzie našaj paŭdniovaj susiedki Ajdaraŭ pakul što zorak ź nieba nie chapaje. Na źmienu im pryjšli zusim jašče maładyja Siarhiej Daškievič, Jaŭhien Ściapanaŭ, Uładzimier Mikłašeŭski, jakija pa abjektyŭnych pryčynach pakul nia mohuć uvajści ŭ elitu suśvietnaha bijatlonu. Rustam Valiŭlin, Alaksandar Syman i Siarhiej Novikaŭ pakul što taksama nia mohuć uziać na siabie rolu lideraŭ zbornaj, tamu, u lepšym vypadku, biełaruskija spartoŭcy zajmajuć miescy ŭ trecim dziasiatku, a to i nižej. Na jakasny praryŭ u Antcholcy raźličvać nie vypadaje.
Aściarožnuju nadzieju na dobryja miescy pakidaje žanočaja kamanda, dzie taksama adbyvajucca karennyja źmieny. Sa sportu syšła šmatrazovaja čempijonka śvietu Alena Zubryłava, sioleta jana jašče vychodziła na adnu z honak etapu kubku śvietu, ale nia zdoleła pakazać hodny vynik i pryniała kančatkovaje rašeńnie pra sychod. U dakretny adpačynak syšli Volha Nazarava i Kaciaryna Ivanova. Razam z tym, u novym sezonie zusim pa-inšamu stała vystupać veteran kamandy Natalla Sakałova. Jana niaredka traplała ŭ vynikovyja dziasiatki, a ŭ apošniaj honcy pierad čempijanatam śvietu zaniała pryzavoje treciaje miesca. Jość spadzievy i na maładuju Darju Damračovu, jakaja taksama raduje vynikami. Dzivić nieracyjanalnaje vykarystoŭvańnie talentu hetaj spartoŭki biełaruskaj federacyjaj bijatlonu: zamiest spakojnaj padrychtoŭki da čempijanatu planety, Dašu kidajuć u rubku Ŭniversijady i junijorskaha čempijanatu śvietu, spabornictvaŭ druhasnych. Damračova, kaniečnie, uziała ŭ hetych turnirach medali, ale viarnułasia ŭ asnoŭnuju kamandu absalutna stomlenaja. Niadrennyja vyniki taksama pakazvaje Volha Kudrašova. Mienavita jany, a taksama Ludmiła Anańka, mohuć začapicca za pjedestał u estafetnaj honcy.
Siarod najbolš vierahodnych kandydataŭ na medali čempijanatu: u mužčynaŭ — nieparaŭnalny narvežac Ole‑Ejnar Bjorndalin, niemiec Michel Hrajs, francuz Rafael Puare, jaki niadaŭna staŭ baćkam i choča adśviatkavać hetuju padzieju pieramohami, rasiejec Mikałaj Kruhłoŭ, a taksama aŭstryjec Krystaf Suman, jaki niečakana ŭvarvaŭsia ŭ bijatlonnuju elitu. U žančyn najbolš vierahodnymi pretendentkami na medali ličacca niemki Kaci Vilhielm, maładaja Mahdalena Nojner, Andrea Chienkiel, švedka Anna‑Karyn Ołafsan, francužanka Sandryn Bieji, narvežka Linda Hruben. I, naturalna, što niechta moža padnieści zusim niečakany siurpryz.
Fota biathlon-antholz.it
