Adzin z najstarejšych biełaruskich rep-hurtoŭ -- «Niestandartny varyjant» -- paviedamiŭ pra skančeńnie muzyčnaj dziejnaści.
Jak patłumačyŭ «Tuzinu Hitoŭ» adzin z zasnavalnikaŭ kamandy Źmicier «Mich» Michnievič, takoje rašeńnie było spravaj nie adnaho dnia, jano abdumana i ŭzvažana: «Faktyčna my nie pracavali nad novymi trekami ŭžo niekalki hadoŭ, a tolki praciahvali kancertnuju dziejnaść. Pra pryčyny hetaha ciažka skazać adnaznačna. Mahu vyłučyć niekatoryja ź ich. Heta najpierš uzrost i nieaktualnaść našaj muzyki, asabistyja ŭzajemaadnosiny, prablemy sa zdaroŭjem, ciažkaści sumiaščeńnia asnoŭnaj pracy i muzyki, siamja...».
Na dumku repiera, za apošnija 10 hod chip-chop vielmi źmianiŭsia: «Heta muzyka stała bolš jakasnaj i vysokatechničnaj,
ale ŭ toj ža čas ja nie mahu pryniać sučasny chip-chop, bo jon staŭ hrubym, złym i niesapraŭdnym.Takoj mody my prytrymlivacca nie možam. Na siońnia naša muzyka nieaktualnaja». Mich zaznačaje, što zastajecca pobač z muzykaj i nie vyklučaje, što pry peŭnych umovach kamanda moža adradzicca.
U astatnim jon prosić vykazać słovy padziaki ŭsim słuchačam i siabram «Niestandy» -- «za luboŭ, tryvańnie i doŭhi šlach, jaki prajšli razam».
***
- «Niestandartny varyjant» pačaŭ svaju pracu jašče ŭvosień 1998 h. u Barysavie, i ŭžo u 1999 h. na feście «Chip-Chop Nacyja» hurt atrymaŭ pieramohu ŭ naminacyi «Lepšaja maładaja rep-hrupa». U 2000 h. pryznany najlepšym rep-hurtom Biełarusi. U 2002 h. «Niestandartny varyjant» prachodzić konkursnyja adbory i atrymlivaje zaprašeńnie na ŭdzieł u dvuch najbujniejšych rep-festach Rasiei i Ukrainy «Rap Music'2002» i «In Da House'2002». U 2002 hodzie vychodzić sieryja z troch składanak biełaruskaha repu «Chip-Chop Nacyja», na kožnym dysku byŭ pradstaŭleny ich trek. Pastupova «Niestandartny varyjant» nabyvaŭ viadomaść pa-za miežami Biełarusi. Treki hurta ź Biełarusi vychodziać na šmatlikich ajčynnych, rasijskich, ukrainskich i niamieckich składankach. U 2004 hodzie «Niestanda» zapisvaje svoj pieršy albom, jaki zajmieŭ nazvu «Nie kak Vsie...». Albom uvachodziŭ u dziasiatku lidaraŭ prodažaŭ siarod ajčynnych muzykaŭ razam z «Lapisam», N.R.M., Siaroham dy inšymi. Uviesnu hrupa praviała mini-tur z 10 kancertaŭ pa bujnych haradach Biełarusi ŭ padtrymku alboma. A paśla pierapynku ŭ čatyry hady śviet pabačyŭ jašče adzin albom hurta — «Jele słyšno». «Niestandartny varyjant» zrabiŭ uniosak i ŭ raźvićcio biełaruskamoŭnaha repa — byli zapisanyja dva biełaruskamoŭnyja treki, jakija stali hitami. Hurt zapisaŭ svaju interpretacyju «Pavietranaha šaru» razam ź Lavonam Volskim i hurtom IQ48. A ŭ 2009 h. dla prajektu «Tuzin.Pierazahruzka» zapisaŭ trek «U nieba».
