Mikałaj Statkievič znoŭ pracuje na turemnaj lesapiłcy. Advakat Andreja Sańnikava paskardziłasia ŭ Departament vykanańnia pakarańniaŭ. Źmicier Bandarenka vychodzić na mylicach na ranišniuju zaradku. Pavał Sieviaryniec kamentuje zabaronu listavacca ź Jaŭhienam Vaśkovičam. Źmicier Daškievič maluje na kapertach bieł-čyrvona-biełyja ściahi.
Z byłym kandydatam na prezydenta Mikałajem Statkievičam u Škłoŭskaj kalonii sustreŭsia advakat. Hramadzianskaja žonka palitviaźnia Maryna Adamovič raspaviała pra apošnija naviny.
«Učora ź im bačyŭsia advakat. Dobraja navina taja, što jon zalačyŭ ruku i arytmii serca ŭžo niama. A hetak ŭsio jak było».
Maryna Adamovič paviedamiła, što jana pa-raniejšamu nie atrymlivaje ad Statkieviča listoŭ i ad jaho niama telefonnych zvankoŭ. Advakatu palitviazień kazaŭ, što ad jaho patrabujuć pisać, što nibyta ŭsio dobra. «Mahčyma, tamu i listoŭ niama», — miarkuje Maryna Adamovič.
Mikałaja Statkieviča znoŭ nakiravali pracavać na turemnuju lesapiłku. Trymajuć palitviaźnia ŭ Škłoŭskaj kalonii, były kandydat na prezydenta asudžany na 6 hadoŭ źniavoleńnia pavodle abvinavačańnia ŭ arhanizacyi masavych biesparadkaŭ 19 śniežnia.
Asudžany na 5 hadoŭ za tyja ž padziei eks-kandydat na prezydenta Andrej Sańnikaŭ užo niekalki dzion znachodzicca ŭ Viciebskaj kalonii «Vićba-3», viadomaj tym, što tam z druhoj pałovy 2006 hodu pa siaredzinu 2008 hodu siadzieŭ eks-kandydat na prezydenta padčas vybarčaj kampanii 2006 hodu Alaksandr Kazulin. Maci Andreja Sańnikava Ała Ŭładzimiraŭna miarkuje, što syn zaraz u karantynie, a dakładnych źviestak jana nie maje — advakata da Andreja Sańnikava pakul nie dapuskajuć. 25 listapada z hetaj pryčyny advakat pieradaŭ skarhu ŭ Departament vykanańnia pakarańniaŭ.
«U Departament iści my źbiralisia ź Irynaj, ale ŭ vyniku pajšła advakat vyśviatlać, čamu abaroncu nie dapuścili. Vykłała ŭ skarzie ŭsie arhumenty. Pahladzim, što adkažuć. A bolš ničoha pra Andreja nia viedaju».
Apošni raz list ad syna Ała Sańnikava atrymała bolej za tydzień tamu. 25 listapada vakoł kalonii «Vićba-3» byli rasklejenyja partrety Andreja Sańnikava.
Baćka i siastra Źmitra Bandarenki atrymali ad jaho listy. Žonka palitviaźnia Volha Bandarenka raspaviała.
«Piša, što abstanoŭka, jak pieršyja dva miesiacy. Lečać jaho zaraz choładam i vidać buduć hetak lačyć i dalej. Vyhaniajuć paśla padjomu na mylicach na pastrajeńnie i fizzaradku. Kali raniej byli niejkija pasłableńni, to ciapier — nijakich. Tolki što pracavać nie prymušajuć. Ale jon adznačaje, što heta «pakul».
Kaardynatar «Eŭrapiejskaj Biełarusi» Źmicier Bandarenka siadzić ŭ Mahiloŭskaj kalonii №15. U čas źniavoleńnia viaźniu była zroblenaja aperacyja na chrybietniku, u jaho vialikija prablemy z nahoj.
Adzin z suzasnavalnikaŭ partyi BCHD Pavał Sieviaryniec adbyvaje 3 hady «chimii» za Płošču ŭ Pružanskim rajonie. Palitviazień listujecca ź inšymi asudžanymi, ŭ tym liku adpraviŭ niadaŭna list aktyvistu BCHD Jaŭhienu Vaśkoviču, jaki adbyvaje termin ŭ Mahiloŭskaj turmie za napad na budynak KDB u Babrujsku. Pavodle źviestak ad Vaśkoviča, list Sieviarynca pryjšoŭ pusty, z cydułkaj ad turemnaha cenzara, što listavańnie ź Sieviaryncam zabaronienaje. Pavał Sieviaryniec hetym vielmi ździŭleny, kaža što z takim rašeńniem cenzury sustreŭsia ŭpieršyniu. «Ničoha nadzvyčajnaha ŭ liście nie było, tolki słovy padtrymki dy cytavańnie Biblii».
«Mnie prosta važna pierakanać chłopca ŭ tym, što my možam i pavinny zmahacca z hvałtam niehvałtoŭna. Mahčyma, dla cenzaraŭ važna, kab ludzi chacieli zamahacca hvałtam, tady u ich budzie padstava užyvać hvałt? Nia viedaju. Biezumoŭna, heta biezzakońnie».
Pra listy ad Źmitra Daškieviča i Eduarda Łobava Pavał paviedamiŭ nastupnaje. «Łobaŭ piša vielmi surjozna i pryncypova, bačna, što čałaviek nie złamaŭsia. Źmicier taksama nie skarajecca, jak ułaściva dla jaho, žartuje i maluje na kapertach bieł-čyrvona-bieły ściažok».
Maładafrontaŭcaŭ Źmitra Daškieviča trymajuć ŭ Hłybockaj turmie, Eduarda Łobava — u kalonii ŭ Ivacevickim rajonie.
