Siońnia ŭ Biełarusi ŭstupiŭ u siłu novy zakon «Ab masavych mierapryjemstvach», jaki robić istotna bolš žorstkimi praviły praviadzieńnia apazycyjnych akcyj i adkryvaje praktyčna nieabmiežavanyja mahčymaści dla specsłužbaŭ i pravaachoŭnych orhanaŭ.
U zakonie dadziena charaktarystyka ŭsich masavych mierapryjemstvaŭ — mitynhu, fłešmobu, pikietavańnia, vuličnaha šeścia i h.d. Pašyrajecca pieralik miescaŭ, dzie ich praviadzieńnie nie dapuskajecca.
Upieršyniu rehlamentujecca arhanizacyja mierapryjemstvaŭ praź internet — inicyjatary nia majuć prava źbirać ludziej praz hłabalnuju sietku, nie ŭzhadniŭšy praviadzieńnie akcyj ź miascovymi ŭładami. Da atrymańnia dazvołu zabaraniajecca abviaščać ab dacie, miescy i časie praviadzieńnia akcyj u ŚMI i infarmacyjnych sietkach.
Dla ŭsich arhanizataraŭ, akramia dziaržaŭnych orhanaŭ, ustaloŭvajecca tak zvanaja «płatnaja asnova» — za achovu hramadzkaha pravaparadku ciapier daviadziecca jašče i zapłacić.
Pravy supracoŭnikaŭ pravaachoŭnych orhanaŭ istotna pašyrajucca. Milicyjanty ŭ formie i cyvilnym majuć prava aharodžvać terytoryju z udzielnikami dazvolenaha mierapryjemstva, pravodzić videa- i fotazdymki, dahladać hramadzian.
U vypadku, kali arhanizatar parušyŭ ustalavany paradak, jon pryciahvajecca da adkaznaści, paśla čaho na praciahu hodu pazbaŭlajecca prava na aficyjnuju arhanizacyju padobnych mierapryjemstvaŭ. Supracoŭniki milicyi majuć prava spynić mierapryjemstva, kali ŭhledziać u im pahrozu dla navakolnych.
Kamentujučy nieabchodnaść pryniaćcia novaha zakonu, kiraŭnictva MUS Biełarusi nie chavaje, što papraŭki pryniatyja «ŭ suviazi z apošnimi padziejami ŭ śviecie». Napiaredadni namieśnik ministra ŭnutranych spravaŭ Jaŭhien Połudzień zajaviŭ: «U suviazi ź nieabchodnaściu nie dapuścić takich nadzvyčajnych zdareńniaŭ, jakija adbyvajucca ŭ Libii, Ehipcie, my chočam zabiaśpiečyć biaśpieku našych ludziej. Heta asnoŭnaja zadača zakonu».
Pradstaŭniki demakratyčnaj hramadzkaści kanstatujuć: ćviordyja ramki, u jakija aficyjnaja ŭłada zahnała svaich apanentaŭ, robiać praktyčna lubuju sprobu procidziejańnia režymu kryminalnym parušeńniem.
