Karuźlik pieramahaje drakona — trejler 9

Bo heta nijaki nie praciah, a pieradhistoryja. Kinarežysior Piter Džeksan papularyzuje kinatermin «prykveł». Źjava, jakuju jon paznačaje, staraja, jak «Zornyja vojny». Tyja samyja, dzie chranałahična raniejšyja padziei zdymałasia paśla finalnych sieryj.

Ale ŭsio pa paradku:

u śniežni 2012-ha na ekrany vyjdzie film «Chobit: niečakanaja vandroŭka».

U im — padziei, jakija papiaredničali pakazanym u tryłohii «Uładar piarścionkaŭ». A mienavita:

Bilba Behins (Marcin Fryman) — dziadźka Froda, asnoŭnaha chobita tryłohii — z padačy čaraŭnika Hiendalfa, vypraŭlajecca z trynaccaćciu hnomami na pošuki skarbu. Jon zmahajecca z drakonam, ździajśniaje podźvihi i ŭrešcie zdabyvaje tajamničy piarścionak, ad jakoha budzie zaležać dalejšy los Siarodziemja.

Asobnyja sieryi «Zornych vojnaŭ» zdymalisia ź pierapynkam u paru dziesiacihodździaŭ, tamu minułaje tam vyhladaje technična daskanalejšym za budučyniu. Novaja saha pra chobitaŭ nie budzie pakidać takoha ŭražańnia —

jakija techničnyja źmieny mohuć być u Siarodziemji, dzie zaŭždy panuje Siaredniaviečča?

Dyj film zdymajecca siarod tych samych fantastyčnych novaziełandskich piejzažaŭ, dzie ŭ 2001–2003 kavałasia tryłohija «Uładar piarścionkaŭ». I aktory jašče nie paśpieli syści na piensiju. Nie kažučy pra hierojaŭ. Z tych, chto sustrakaŭsia ŭ chranałahična paźniejšych sieryjach,

u «Chobit» trapili elfy: jany ž, jak viadoma, nie starejuć pa niekalki socień hadoŭ.

Muzyčnaj temaj «Chobita» budzie vielična-sumnaja pieśnia hnomaŭ (kampazitar filma — Hovard Šor).

Film zdymajuć pavodle knihi Džona R. R. Tołkina «Chobit, abo Tudy i nazad». Dakładniej, jaje pieršaj častki. Bo paśla «Niečakanaj vandroŭki» musić być źniataja sieryja «Chobit: Tudy i nazad». Jana źjavicca na ekaranach u 2013-m, abiacaje režysior.

Ale ci ŭdasca pieradhistoryi paŭtaryć absalutny tryumf «Uładara piarścionkaŭ», jaki ŭ 2004-m uziaŭ 11 «Oskaraŭ»?

Zrešty, treba ž častcy kinaaŭdytoryi novaja kazka paśla vyhasańnia Hary Potera.

Darečy, mała chto viedaje, što

saviecki kiniematohraf taksama zrabiŭ uniosak u prasoŭvańnie chobitaŭ u narod.

Film-śpiektakl «Kazačnaja vandroŭka mistera Bilba Behinsa Chobita» pavodle Tołkina byŭ źniaty jašče ŭ 1985-m. Praŭda, chobity ŭ joj nahadvajuć pracaŭnikoŭ budtrestu «Čyrvony ork». Ź inšaha boku: chto tych chobitaŭ bačyŭ nasamreč, aproč Tołkina?

Jaŭhien Kvač

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH