Z hetaj nahody lider demakratyčnych siłaŭ źviarnuŭsia da demakratyčnaj hramadzkaści Biełarusi z admysłovym zvarotam
"Zvarot da demakratyčnaj hramadskaści Biełarusi
Pavažanyja siabry,
U kastryčniku 2005 hoda Kanhres demakratyčnych sił abraŭ mianie adzinym kandydatam u prezidenty Biełarusi. Dziakujučy abjadnańniu tysiačaŭ mužnych i addanych Baćkaŭščynie hramadzian, my praviali paśpiachovuju palityčnuju kampaniju, sabrali sotni tysiačaŭ podpisaŭ, sustrelisia z vybarcami ŭ bolšaści rajonaŭ krainy. Šmat ludziej pazbavilisia strachu i apatyi, niahledziačy na toje, što ŭłada kinuła ŭ turmy bolš za tysiaču čałaviek. Sotni studentaŭ byli vyklučanyja z VNU, šmat kaho pazbavili pracy za «palityku». Choć režym ustajaŭ, ale my pieramahli ŭ śviadomaści mnohich ludziej. Miljony, što hałasavali za nas, vybrali kaštoŭnasnuju alternatyvu: «Svabodu, Praŭdu, Spraviadlivaść».
Siońnia ŭ śviecie ŭžo nichto nie sumniavajecca: biełarusy – heta narod, jaki dastojny być volnym i hatovy zmahacca za Svabodu.
Ja byŭ upeŭnieny, što paśla vybaraŭ my praciahniem supolnuju pracu ŭ kaalicyi, bo pieramahčy možna tolki razam. Tym bolš, što ja adčuvaŭ i adčuvaju tuju vialikuju padtrymku i čakańni našych suhramadzianaŭ. A jany chočuć, kab u nas była adzinaja stratehija, adzin štab, adziny lider.
Adnak kansalidacyi nie adbyłosia. Palityčnaja rada abjadnanych demakratyčnych siłaŭ nie zmahła vykanać abjadnaŭčuju misiju. Paŭhodu zaćviardžaŭsia płan dziejnaści, a, kali byŭ urešcie pryniaty, rada navat nie zmahła stvaryć Vykankam dla jaho realizacyi. Zamiest arhanizacyi supolnaj pracy niekatoryja kiraŭniki partyj pačali zmahacca za liderstva i šmatmiesiačnuju padrychtoŭku da Kanhresu. Mnohija aktyvisty tak zachapilisia baraćboj za miesca na hetym forumie, što zabylisia pra hałoŭnaje – pracu ź ludźmi – navat padčas miascovych vybaraŭ.
Na vialiki žal, pieršapačatkovyja damoŭlenaści byli anulavanyja, źmienieny pracedury vyłučeńnia delehataŭ na Kanhres, a z pryčyny peŭnych manipulacyjaŭ z podpisami rezka ŭzmacniłasia napružanaść unutry kaalicyi, asabliva rehijonach.
Ja — za abjadnańnie demakratyčnych siłaŭ, ja – za Kanhres, ale Kanhres, jaki budzie sklikany pavodle prazrystych, uzhodnienych pracedur i mieć šyrokaje demakratyčnaje pradstaŭnictva. Ja hatovy pryniać udzieł u novym Kanhresie tolki kali na im budzie abrany lider abjadnanych demakratyčnych sił z dastatkovymi dla arhanizacyi efiektyŭnaj dziejnaści paŭnamoctvami.
Kanhres maje adbycca praź miesiac, ale i siońnia niama ŭzhodnienych pazicyj pa jahonym źmieście i metach. Niadaŭna Palityčnaja rada pryniała rašeńnie, što adziny lider niepatrebny. Heta adkidvaje nas na niekalki hadoŭ nazad u pabudovie alternatyvy isnujučamu režymu. Liderami buduć ciapier usie kiraŭniki partyj, tolki pa čarzie na niekalki miesiacaŭ.
Ja bolš nie mahu zastavacca zakładnikam takoj situacyi i nie chaču ŭdzielničać va ŭnutranych razborkach. Demakrataŭ šmat u čym spraviadliva paprakajuć u adsutnaści realnych dziejańniaŭ. Ja suprać taho, kab kankurencyja pamiž liderami partyj pahłynuła ŭvieś patencyjał demakratyčnaj kaalicyi.
Tamu zajaŭlaju pra niemahčymaść majho ŭdziełu ŭ majučym adbycca ŭ sakaviku Kanhresie, bo jon pryviadzie tolki da raźjadnańnia demakratyčnych siłaŭ.
Siońnia nam treba ŭsie namahańni skiravać na padrychtoŭku biełaruskaha Dnia Voli".
