Uładzimier Pucin prycišvaje prezydenckuju honku ŭ Rasiei. Siarhiej Ivanoŭ, jaki apošnim časam hublaŭ bały ŭ spabornictvie ź Dźmitryjem Miadźviedzievym, pryznačany pieršym vice‑premjeram Rasiei.
Dźmitry Miadźviedzieŭ dy Siarhiej Ivanoŭ, pavodle hramadzkaj dumki, hałoŭnyja kandydaty na toje, kab być nastupnikami Pucina. Prezydent davieryŭ im funkcyi vice‑premjeraŭ jašče ŭvosień 2005‑ha, kab — jak ćvierdziać ahladalniki — abodva mahli pravieryć siabie ŭ spabornictvie za papularnaść, a taksama prychilnaść rasiejskaj biurakratyi i kramloŭskaha łobi.
Prezydenckija vybary zaplanavanyja na sakavik 2008 h.
Apošnimi tydniami ŭ prezydenckaj honcy vyrazna vyjhravaŭ Miadźviedzieŭ, jaki ŭ rasiejskich umovach ličycca liberałam i prychilnikam intehracyi z Zachadam. Jahonyja pieravahi nie abminali dziaržaŭnyja telekanały, jakija nie škadavali eternaha času dla abodvuch vice‑premjeraŭ i vyrazna stajali na baku Miadźviedzieva. Jon taksama byŭ kiraŭnikom rasiejskaj delehacyi ŭ Davosie, što było ŭspryniata jak vyrazny znak prychilnaści Pucina.
Učorašniaje pryznačeńnie Siarhieja Ivanova na pasadu pieršaha vice‑premjera (h.zn zraŭnavańnie statusu ź Miadźviedzievym) moža być — pavodle pieršych rasiejskich kamentaroŭ — sprobaj vyraŭnoŭvańnia šancaŭ abodvuch kankurentaŭ. Bo kali kramloŭskija elity imknucca jak maha chutčej vyłučyć pierajemnika prezydenta, dyk Uładzimier Pucin nie žadaje zaŭčasna admaŭlacca ad roli adzinaha demiurha i adciahvaje abviaščeńnie svajho pieramienika. Padčas niadaŭniaj pres‑kanferencyi ŭ Kramli jon skazaŭ, što proźvičša kandydata jon abvieścić publična tolki ŭ časie vybarčaj kampanii, h. zn. u listapadzie – śniežni.
Ivanoŭ, jakomu Pucin daručyŭ kantrol vajennaha sektaru, a taksama «častki hramadzianskaj haspadarki» (zvalniajučy z pasady kiraŭnika Ministerstva abarony), ličycca kandydatam, bolš blizkim da kramloskich «siłavikoŭ», h.zn. vajskova‑milicejskaha łobi. Pa adukacyi specyjalist pa anhielskaj i švedzkaj movach, jon słužyŭ u KDB, a ŭ 90‑ch uznačalvaŭ FSB.
I chacia ŭ svaich pramovach Ivanoŭ lubić apelavać vialikadziaržaŭnymi arhumentami, heta, na dumku šmat jakich znaŭcaŭ rasiejskaj palityki, nie źjaŭlajecca absalutnym admaŭleńniem strymana prazachodniaj pazycyi Miadźviedzieva. – Roźnica ŭ pohladach dosyć niuansavanaja. Abodva jany znachodziacca ŭ lahiery kramloŭskich liberałaŭ u jaho šyrokim razumieńni – kazaŭ niadaŭna rasiejski publicyst Jaŭhien Kisialoŭ.
Novym kiraŭnikom Ministerstva abarony ŭčora staŭ Anatol Sierdziukoŭ, jaki da hetaha ŭznačalvaŭ padatkavyja słužby. Sierdziukoŭ – heta čarhovy palityk, jakoha Pucin pryciahnuŭ u Maskvu sa svajho rodnaha Pieciarburha.
