Siońnia aznajomiŭsia z novym pakietam analityki ad zarehistravanaha ŭ Vilni NISEPD (praściej kažučy, ad prafesara Manajeva).
Darečy, tolki što hetyja artykuły z tablicami pavodle vynikaŭ apytańnia, zładžanaha ŭ apošniaj dekadzie studzienia, źjavilisia i na ichnim sajcie.
Usio adrazu nie achopiš. Tolki niekalki ličbaŭ i vysnovaŭ.
1. Rejtynh davieru Łukašenku źniziŭsia ź listapada na 4,9%, ale pa-raniejšamu vysoki — 55,4%. A kab vybary byli zaŭtra, jamu b addali hałasy 50,9% (heta tak zvany pražektyŭny rejtynh).
Ź inšaha boku, pakazčyki papularnaści kiraŭnika dziaržavy ŭ versyi NISEPD ŭsio adno chranična nie daciahvajuć da aficyjnaj statystyki "elehantnych pieramohaŭ".
Tak što zdahadajciesia z troch razoŭ, kaho chočuć kančatkova vykinuć z hulni na sacyjalahičnym poli zakonaprajektam "Ab apytańniach hramadzkaje dumki". Jon biaz šumu i pyłu rychtujecca ŭ nietrach orhanaŭ ułady.
Darečy, kali zakon budzie pryniaty ŭ tym drakonaŭskim varyjancie, ź jakim ja ŭ svoj čas aznajomiŭsia, to apynucca pad udaram i medyi, što karystajucca źviestkami "niapravilnych" (to bok nie akredytavanych admysłovaj kamisijaj) sacyjolahaŭ.
Adno što sajt NISEPD prydušyć budzie składana.
Žyvie Sieciva!
2. Kali b siońnia prachodziŭ referendum u pytańni abjadnańnia Biełarusi i Rasiei, to "za" vykazałasia b 35,1%, suprać — 39,3% (rešta b nia ŭdzielničała ci ŭstrymałasia).
Jašče letaś u listapadzie praporcyja była 46,4:33,5 na karyść prychilnikaŭ "bratniaha jadnańnia".
Prahres zaŭvažny, ale plaskać u ładki nie vypadaje. Heta šmat u čym nastupstva naftahazavaj vajny, kali prapahanda ŭźniała da kipieńnia hradus antyrasiejskaj rytoryki.
Kali raptam kivač kiroŭnaj palityki pojdzie ŭ advarotny bok — hetaja praporcyja moža chutka pachisnucca.
Narešcie, tryvožnym symptomam jość toje, što pry astyvańni intehracyjnaha impetu dola prychilnikaŭ eŭrapiejskaha vybaru praktyčna nie padvyšajecca. To bok — rastuć izalacyjanisckija nastroi. Što i treba viarcham.
3. Ciapierašniaja dziaržaŭnaja symbolika, jak ni kryŭdna zmaharam za biełaruščynu, maje niamała prychilnikaŭ. Jaje ŭchvalajuć až 59,2% apytanych. 26,3% staviacca abyjakava i tolki 12,1% — nie ŭchvalajuć.
Ale!
Kali siarod asobaŭ z pačatkovaj adukacyjaj za jaje — až 79,9%, to siarod tych, chto maje dyplomy VNU, takich adeptaŭ tolki 47,7%.
Taksama, kaniešnie, da čorta :(
Ale kantrast uražalny.
Naprošvajecca vysnova, što balšynia suajčyńnikaŭ prosta nia viedaje historyi nacyjanalnych symbalaŭ. Zvyš taho, naturalna, małaadukavanaj masaj lohka manipulavać. Jana melanchalična pieražoŭvaje prapahandovuju žujku.
I jašče admietny momant. Najmieniej prychilnikaŭ ciapierašnich hierba, ściaha dy himnu va ŭzrostavaj katehoryi ad 25 da 29 hadoŭ.
Heta tyja, chto ŭ junactvie hłynuŭ pavietra svabody.
Heta tyja, chto staleŭ, kali nad Domam uradu łunaŭ bieł-čyrvona-bieły štandar.
Tak što ziernie, pasiejanaje na pačatku 90-ch, daje ŭschody.
Vyjście adno: i dalej zasiavać nivu.
Našu nivu :)