Maładoj iranskaj aktorcy Halšyfcie Farachani, jakaja pražyvaje ŭ Francyi, urad Irana zabaraniŭ viartacca na radzimu paśla taho, jak jana źniałasia aholenaj dla časopisa Le Figaro na znak pratestu suprać abmiežavańniaŭ pravoŭ žančyn u Iranie.
Fota aholenaj Farachani vyklikała aktyŭnaje abmierkavańnie ŭ Iranie i na Blizkim Uschodzie paśla taho, jak jana apublikavała jaho na svajoj staroncy ŭ Facebook (fota).
Maładaja aktorka pakinuła Iran u minułym hodzie na znak pratestu suprać abmiežavalnych isłamskich zakonaŭ, jakim vymušanaja padparadkoŭvacca iranskaja kinaindustryja ŭ adpaviednaści z kansiervatyŭnaj kulturnaj palitykaj prezidenta Achmadziniežada.
«Mianie aficyjna apaviaścili ź Ministerstva kultury i isłamskaj aryjentacyi, što Iran nie maje patreby ŭ aktorach abo artystach, i ja mahu prapanavać svaje pasłuhi
Farachani pačała hrać u teatry ŭ 6 hadoŭ, a ŭ 14 źniałasia ŭ pieršym filmie i adrazu ž atrymała zvańnie najlepšaj aktorki na Tehieranskim kinafiestyvali «Fadžr».
Z tych časoŭ jana źniałasia jašče ŭ 15 filmach, praktyčna ŭsie ź jakich atrymali ŭznaharody na roznych kinafiestyvalach.Adzin z apošnich filmaŭ, «Santury», dzie jana źniałasia ŭ roli žonki hałoŭnaha hieroja — muzyki, što pryvyk da narkotykaŭ, staŭ pikam jaje papularnaści, pry tym, što ŭ masavy pakaz film da hetaha času nie vyjšaŭ.
Akramia pracy ŭ kino Farachani źjaŭlajecca aktyvistkaj pryrodaachoŭnaha ruchu.
Farachani źniałasia razam ź Leanarda Dy Kaprya ŭ halivudskim filmie «Sukupnaść many» dzie syhrała miedsiastru, jakaja dapamahaje paranienamu amierykanskamu ahientu papravicca i zaviaršyć svaju misiju ŭ musulmanskaj krainie.
Publikacyja fota aktorki supała z prysudžeńniem «Załatoha hłobusa» iranskamu filmu «Razvod Nadera i Simin», paśla čaho iranskija ŭłady zahadali začynić Dom kino ŭ Tehieranie. Farachani hrała ŭ mnohich filmach režysiora «Razvodu» Ashara Farchadzi.
Praź niekalki hadzin paśla taho, jak fatahrafija była apublikavanaja, Farachani atrymała tysiačy kamientaroŭ ad prychilnikaŭ na jaje staroncy Facebook, adny ź jakich vinavacili jaje ŭ «nieprystojnaści», a inšyja zachaplalisia «mužnaściu ŭ baraćbie za pravy žančyn u musulmanskich krainach».
Iranskaje kino znachodzicca pad vialikim presinham isłamskich uładaŭ krainy.Samaja hučnaja sprava, źviazanaja z kiniematohrafam, była raspačataja suprać režysiora Džafara Panachi, pieramožcy kinafiestyvalaŭ u Kanach, Vieniecyi i Bierlinie. U mai 2010 hoda jon byŭ aryštavany razam sa svaim kaleham Machamadam Rasułafam.
Paśla taho jak za režysiora ŭstupiłasia ŭsia suśvietnaja kinasupolnaść, jaho časova vypuścili pad zakład, ale praz paŭhoda nie tolki prysudzili da turemnaha źniavoleńnia terminam na šeść hadoŭ, ale i zabaranili 20 najbližejšych hadoŭ zdymać filmy, pisać scenary, mieć znosiny z žurnalistami i vyjazdžać z krainy.
U čakańni vierdyktu apielacyjnaha suda Panachi źniaŭ pra svajo žyćcio karcinu «Heta nie film», jakuju pakazali ŭ Kanach. Adnak pietycyi, padpisanyja Marcinam Skarseze, Frensisam Fordam Kopałam, Robiertam De Nira, bratami Koen, Styvienam Śpiłbierham, Olivieram Stoŭnam, dziasiatkami inšych kanaznakamitaściaŭ i dyrektarami viadučych mižnarodnych fiestyvalaŭ, nie paŭpłyvali na sudździaŭ: prysud pakinuli ŭ sile, i tolki Rasułafu skaracili termin źniavoleńnia da 1 hoda.
Vialiki mižnarodny rezanans vyklikaŭ i los aktorki Marzii Vafamiechr, jakuju prysudzili da 90 udaraŭ puhaj i źniavoleńnia za źniaty ŭ Aŭstralii film «Rasprodaž majho Tehierana», dzie havorka idzie pra aktorku, jakaja pakutuje ad zabarony na zdymki. Praŭda, hety vierdykt u vyniku byŭ zamienieny bolš miakkim.
Razam z tym, iranskaje kino praciahvaje vyklikać cikavaść na mižnarodnych fiestyvalach i akramia palityki.Tak, stužka Ashara Farchadzi «Razvod Nadera i Simin», dzie katalizataram kanfliktu pamiž mužam i žonkaj robicca jaje žadańnie luboj canoj emihravać, atrymała ŭ minułym hodzie na Bierlinale «Załatoha miadźviedzia» za najlepšy film i «Srebnaha miadźviedzia» za aktorski ansambl, a taksama była ŭdastojena zvańnia najlepšaha zamiežnaha filma hoda ad amierykanskaj asacyjacyi kinakrytykaŭ i ciapier ličycca adnym z najmacniejšych kandydataŭ na «Oskar» za najlepšy zamiežny film.
