Majstar sportu pa baraćbie, jaki zachaplajecca Fielini i Bierhmanam. Režysior «Biełsata», adzin ź filmaŭ jakoha byŭ zrobleny dla BT. Amatar kłubnaha žyćcia stalicy, jaki padarožničaje pa Paleśsi ŭ pošukach hierojaŭ. Hutarka z 28-hadovym režysioram-dakumientalistam Andrejem Kuciłam.
«Zdymać, zdymać, zdymać»
«Nu, što, pa piŭku?» – badziora prapanoŭvaje Andrej, jaki vonkava bolš nahadvaje kazačnaha biełaruskaha vołata, čym stomlenaha ad šmatlikich prajektaŭ režysiora-dakumientalista. Jon uśmichajecca aficyjantcy kaviarni «Skif», enierhična razmachvaje rukami i ź pijanierskim zapałam razmaŭlaje pra ŭsio na śviecie.
Praz dva tydni Kuciła jedzie ŭ ZŠA: abmieńvacca dośviedam i šturmavać novyja techničnyja vyšyni. Ciapier ža pracuje jak saaŭtar, apieratar i mantažor na prajekcie «Biełsata» «Pierajemniki». Pavodle Kuciły, heta budzie telecykł nievialikich dakumientalnych filmaŭ «pra narmalnych maładych ludziej sa zdarovaj hałavoj, jakija buduć stvarać Biełaruś paśla Łukašenki». Siarod narmalnych, na dumku Kuciły, -- paet Hleb Łabadzienka i aktor Raman Padalaka.
«Ja valaŭsia na padłozie padčas prahladu svajho filma»
Paśla treciaha kufla Kuciła pačynaje raskazvać pra radaści i niebiaśpieki fiestyvalnaha žyćcia. U jahonaj asabistaj zale słavy jość admysłovy pryz Hildyi kinakrytykaŭ i kinaznaŭcaŭ na «Listapadzie» za «Dniuku» i ŭdzieł u International Documentary Film Festival Amsterdam – hetkich Kanach dakumientalnaha kino. Dy jašče šerah uznaharod tam-siam.
«Pieršy raz na fiestyval ja trapiŭ u 24 hady ź filmam “Fokusnaja adlehłaść”, – kaža Kuciła. – Vielmi ŭrazili fiestyvali ŭ Lajpcyhu, dzie ŭ multypleksie na 8 załaŭ pakazvajuć tolki dakumientalnaje kino z usiaho śvietu, i ŭ Amsterdamie, dzie adnojčy, dobra pjany, ja valaŭsia na padłozie padčas prahladu svajho filma, niešta tam kryčaŭ, a achoŭnik mianie aściarožna pierastupaŭ i sprabavaŭ supakoić. Nasamreč, šalonaja atmaśfiera na hetych fiestyvalach».
Pasyłać svaje pracy na fiestyvali treba, kaža Kuciła, choć i nie varta rabić z hetaha sens tvorčaści i tym bolš žyćcia: «Pryjechali, papili, pahulali, u muziej schadzili – i ŭsio, žyvicie dalej i zdymajcie kino».
Kaviarnia sa słavianafilskaj nazvaj «Skif» apuścieła, piva skončyłasia, i nam z Andrejem tolki i zastajecca, što razmaŭlać na liryčnyja temy – pra tvorčaść i Radzimu: «Kali pracuju nie na zamovu, to majo kino ŭźnikaje z uražańnia. Adnojčy ja pačuŭ na radyjo “Kultura” biełaruskija kałychanki, jakija raniej śpiavali žančyny ŭ vioskach. Mahčyma, mianie maci niedakałychała ŭ dziacinstvie, ale ja adrazu adčuŭ niejkuju samotnuju piaščotu i zrazumieŭ, što chaču źniać niešta z padobnaj atmaśfieraj. Tady ŭ mianie jašče nie było paśviedčańnia kiroŭcy, i ja razam z baćkam pajechaŭ pa paleskich vioskach šukać patrebnych hierojaŭ. Urešcie trapiŭ na žančynu, jakaja mnie i była patrebnaja dla filma».
Užo ŭ kancy razmovy, pa staroj biełaruskaj tradycyi, usio ž uspłyvaje adviečnaja tema pierśpiektyvaŭ krainy pad biełymi kryłami: «Pakul našaja kraina – heta reziervacyja. U mianie jość narmalnaje adčuvańnie maładości, mocy, jość praca, dzieŭki dy kampanija. Ale niama z hetaha nijakaha vychadu, byccam usio zakansiervavanaje. Mabyć, svaimi dakumientalnymi filmami ja i zapuskaju trochi pavietra ŭ słoik pad nazvaj Biełaruś».
«Dniuka» (2010) | Režysiory: Andrej Kuciła i Alaksandr Nalivajka.
Miedytatyŭnaja 45-chvilinnaja stužka pra žyćcio pary biełaruskich starych u paleskaj vioscy Łyšča Pinskaha rajona. Malaŭničaja i realistyčnaja karcina mikrakosmasu starych ludziej ź ich prostymi niahodami i radaściami. Śpiecpryz Hildyi kinakrytykaŭ i kinaznaŭcaŭ na fiestyvali «Listapad-2010», Hran-pry fiestyvalu rehijanalnych telekanałaŭ u Košyce (Słavakija), pryz za najlepšy dakumientalny film na Fiestyvali niezaležnaha kino ŭ Lvovie.
Kill the Day / Dniuka from praktic on Vimeo.
«Fokusnaja adlehłaść» (2008) | Režysiory: Andrej Kuciła i Raman Ramaška.
U depresiŭnym pravincyjnaj rasijskim horadzie žyvie samotny fotamastak. Siarod jahonych prac značnaje miesca zajmajuć partrety maładoj, pryhožaj dziaŭčyny. Heta jahonaja dačka, što źjechała ŭ Šviejcaryju i nie padtrymlivaje z baćkam nijakich kantaktaŭ. Mužčyna znoŭ i znoŭ drukuje i razmaloŭvaje jaje zdymki. Film – udzielnik Krakaŭskaha i Lajpcyhskaha fiestyvalaŭ dakumientalnaha kino.
Andrej Kuciła "Fokusnaja adlehłaść" [34mag.net] from 34video on Vimeo.
«Vo vsiem mnie chočietsia…» (2006) | Režysior: Andrej Kuciła.
Adna z rańnich hulniavych pracaŭ. Muvik sychodzić karaniami ŭ ekśpierymientalny karotki mietr. Pavodle lehiendy, film byŭ zrobleny paśla niaŭdałaha zdymačnaha dnia niedzie ŭ pravincyi, kab nie viartacca damoŭ biez materyjału.
Andrej Kuciła "Vo vsiom mnie chočietsia..." [34mag.net] from 34video on Vimeo.
