«Paśla Pucina... budzie Pucin,» – zajaviŭ učora ŭ Varšavie Hleb Paŭłoŭski, viadučy rasiejski palitolah, adkazvajučy na pytańnie ab mažlivym pierajemniku rasiejskaha prezydenta. – «Pucin zrabiŭ svaju spravu, i jon zastaniecca ŭ centry rasiejskaj palityki niezaležna ad taho, chto budzie vybrany prezydentam».
Apanentami Hleba Paŭłoŭskaha, palittechnolaha j daradcy rasiejskaha prezydenta, na dyskusii, arhanizavanaj polskaj hazetaj «Dziennik», byŭ Uładzimier Bukoŭski – dysydent, intelektuał, znakavaja postać antykamunistyčnaha supracivu ŭ SSSR, a taksama polskija historyki Ŭładzimiež Marciniak i Andžej Novak.
Hleb Paŭłoŭski padčas kanferencyi abaraniaŭ tuju źniešniuju i ŭnutranuju palityku, jakuju viadzie Rasieja pad kiraŭnictvam Ŭładzimira Pucina.
Hleb Paŭłoŭski zapeŭnivaŭ prysutnych u tym, što Rasieja nia choča suśvietnaj hiehiemonii, adradžeńnia jałcinskaj systemy časoŭ chałodnaj vajny. «Nacyjanalnaj Rasiei, jak i nacyjanalnaj Polščy ŭ jałcinskim dahavory niama. Zaraz u śviecie daminujuć ZŠA, i tak budzie praciahvacca datul, pakul raźvityja nacyi nie voźmuć sabie toje, što naležyć im pa pravu» – zajaviŭ rasiejski palitolah.
Sprabujučy pierakanać słuchačoŭ u tym, što Rasieja nie maje nivodnaj prykmiety imperskaj dziaržavy, daradca rasiejskaha prezydenta zajaviŭ nastupnaje:
H. Paŭłoŭski: My nia majem nijakich idej adnosna taho, jak pavinna być kiravanaja Polšča, jak pavinna być kiravanaja Hruzija. Ščyra kažučy, nam plavać na toje, jak budavanaja Hruzija, nam plavać na hruzinskuju ekanomiku, nam plavać na amierykanskuju ekanomiku i (ja raskryju vam strašnuju tajamnicu) nam plavać na polskuju palityku.
Hałoŭnaj biadoj, jakaja pastaviła Rasieju u 90‑ch hadoch na kraj katastrofy, na dumku Paŭłoŭskaha, była «denacyjanalizacyja», naviazanaja «čužoj złoj volaj». Ludźmi, pazbaŭlenymi nacyjanalnaj śviadomaści, maralnych kaštoŭnaściaŭ, lohka manipulavać. Jak pryznajecca Paŭłoŭski, jen pierajšoŭ na bok prezydenta Jelcyna, kali toj pačaŭ praces adbudovy nacyjanalnaj Rasiei – i pačaŭ jaho z vajny ŭ Čačni.
Na pytańnie, čamu źniščeńnie nacyjanalnaj samaśviadomaści susiedniaj Biełarusi adbyvajecca pry poŭnaj padtrymcy rasiejskaha kiraŭnictva, spadar Paŭłoŭski adkazaŭ, što, na jaho dumku, Łukašenka nie źjaŭlajecca praciŭnikam biełaruskaha suverenitetu j navat admaŭlajecca pa hetaj pryčynie ad uvachodžańnia Biełarusi ŭ skład Rasiei:
H. Paŭłoŭski: Łukašenka mnie skazaŭ nastupnaje: Kali b Biełaruś uvajšła ŭ skład Rasiei, to była b novaja Čačnia, my b usie pajšli ŭ ziamlanki. I heta była b nie takaja Čačnia, jak na Kaŭkazie! Vy pamiatajecie, jak biełarusy viali siabie ŭ časy Druhoj Suśvietnaj vajny? Jany pavodzili siabie nia tak jak palaki, jany svaich habrejaŭ nie vydavali, jany svaich habrejaŭ abaraniali. I ja vymušany byŭ zhadzicca ź im.
Adkrytaje abvinavčvańnie palakaŭ u kalabaracyjaniźmie padčas vajny j antysiemityźmie vyklikała chvalu abureńnia ŭ zali.
Daradca prezydenta Rasiei Hleb Paŭłoŭski adkazaŭ i na inšyja pytańni Polskaha radyjo dla zamiežža. Sutnaść rasiejskich intaresaŭ u Biełarusi palittechnolah raskryŭ nastupnym čynam.
H. Paŭłoŭski: Sajuz Rasiei j Biełarusi – heta naš centralny intares, i my spadziajemsia, što prezydent Łukašenka razumieje ŭsiu važnaść hetaha sajuzu, tym bolš zaraz, kali na Biełarusi majuć adbycca surjoznyja reformy jaje ekanomiki. Jana patrabuje padtrymki, u tym liku i ŭ kredytach.
Ad adkazu na pytańnie, ci nie rychtuje Kreml zamieny Łukašenku na vypadak, kali toj stanie pieraškodaj u rasiejska‑biełaruskich stasunkach, rasiejski palitołah uchiliŭsia:
H. Paŭłoŭski: My nia dziejničajem praz hałovy prezydentaŭ. Moža heta j niapravilna, ale.... my kanservatyŭnyja.
Słovy Hleba Paŭłoŭskaha razychodzilisia z tym, što jon kazaŭ usiaho miesiac tamu padčas dyskusii ź biełaruskim palitolaham Juryjem Šaŭcovym. Tady daradca rasiejskaha prezydenta kazaŭ ab Sajuzie Biełarusi j Rasijei jak fikcyi, vykazvaŭsia za rynkavyja adnosiny pamiž dźviuma dziaržavami. Takuju niepaśladoŭnaść spadar Paŭłoŭski rastłumačyŭ nastupnym čynam:
H. Paŭłoŭski: Jość vajskova‑stratehičny sajuz, i jon funkcyjanuje vielmi dobra. Ekanamičny stasunki prablematyčna, ale funkcyjanujuć, u ahulnym, dobra. Prablemy ŭ palityčnym sajuzie i ŭ inerpretacyi spadarom Łukašenkam palityčnaha sajuzu jak asnovy dla ekanamičnym preferencyjaŭ. Voś tut uźnikaje prablema. U nas niama prablemaŭ pa vajskova‑stratehičnamu ŭzajemadziejańniu. Heta vielmi važna. U nas ź Biełaruśsiu spakojnaja miaža, i my heta cenim.
Uładzimir Bukoŭski, adzin z samych viadomych savieckich dysydentaŭ, vostra raskrytykavaŭ tezisy kramloŭskaha palitolaha. Na dumku Bukoŭskaha, trahiedyja Rasiei zaklučana ŭ niapravilna sfarmulavanaj nacyjanalnaj idei, zasnavanaj na etničnym pryncypie j kancepcyi vialikaj usieŭładnaj dziaržavy. Takaja ideja stanovicca niebiaśpiečnaj u šmatnacyjanalnaj krainie – i vyniki hetaha bačnyja ŭžo siońnia.
Pucinskaja administracyja ŭ astatnija hady zaniataja tolki pošukam vorahaŭ, bo tolki pačućcio źniešniaj pahrozy moža abjadnać hramadztva ŭ krainie, dzie kultyvujecca nacyjanalizm. Ale vorahi ŭvieś čas drabniejuć. Kali raniej heta byŭ «uvieś suśvietny imperyjalizm», to zaraz – Łatvija, Estonija, Hruzija, Małdova...
U sučasnaj Rasiei amal nie zastałosia alternatyŭnaha myśleńnia, niama hramadzkaj dumki.
Kali raniej, pry ŭsich niedachopach jelcynskaha režymu, adnosiny z subjektami federacyi j susiednimi krainami budavalisia na pryncypach partnerstva — to siońnia vakoł Rasiei i ŭnutry jaje zastalisia tolki raby j satelity. A rabstva j ksenafobija źjaŭlajucca słabym padmurkam dla adzinstva dziaržavy. Ekanamičny kryzys moža pryvieści navat da dezyntehracyi Rasiei – i kryzys 1998 hodu heta pakazaŭ, – paviedamiŭ były saviecki dysydent.
Rasieja pavinna pierastać vučyć inšyja krainy jak žyć, a zaniacca prablemami ŭłasnaha narodu, asabliva kali pryhadać, što astranamičnyja ceny na naftu nie zaŭsiody buduć takimi vysokimi – padkreśliŭ Uładzimir Bukoŭski.
