Nu voś ŭsio i viarnułasia na kruhi svaje.
Znoŭ "vyšej za ŭsio — naša družba z rasiejcami. My sa śviatym žartavać nia budziem".
Hetak zajaviŭ siońnia biełaruski aficyjny kiraŭnik televizijnikam arabskaj "Al-Džaziry", viadomaj pakazami demaničnaha bin Ladena.
BIEŁTA daje ścisły pierakaz havorki, ale pakazalna toje, što vyłučana.
Hałoŭnaja vysnova: stasunki z Kramlom znoŭ pierajšli ŭ fazu kali nie reveransaŭ, to niežadańnia dražnić husaka.
Sapraŭdy, nijakich "žartačak sa śviatym" :)
Nijakich namiokaŭ na toje, što naftavyja dy inšyja hiešefty my jašče lepiej z zachodnikami zładzić možam.
Palitolah Andrej Fiodaraŭ tolki što prakamentavaŭ mnie:
— Sytuacyja zrazumiełaja. Treba ž atrymać kredyt na paŭtara miljardy ad Rasiei. Pryčym na jak maha vyhadniejšych umovach. Lepiej navat nie biespracentavy, a ŭvohule biezzvarotny.
Ale Fiodaraŭ ličyć, što vyśviatleńnie stasunkaŭ z Kramlom daloka nia skončyłasia.
Sapraŭdy, kredyt Rasieja najchutčej što daść. Naftadalaraŭ da chalery.
Umovy, pryčym umovy palityčnyja — voś hałoŭnaja niebiaśpieka.
Ci vypadkova maskoŭski kaleha Jarmošynaj — Viešniakoŭ raptam daŭ aficyjnaje zaklučeńnie, što abjadnaŭčy referendum u Rasiei možna zładzić kali zaŭhodna? Jość, maŭlaŭ, prałaz u zakanadaŭstvie, jakoje ŭvohule zabaraniaje plebiscyty ciaham apošniaha hodu paŭnamoctvaŭ Dumy i prezydenta Rasiei.
Raniej, darečy, toj samy Viešniakoŭ pra perspektyvy takoha referendumu vykazvaŭsia skieptyčna. Dy i Łukašenka kolki času tamu daŭ zrazumieć, što da sychodu Pucina kanstytucyjny akt možna ličyć hłyboka zakapanym.
Ale ŭ Rasiei, miž inšym, nie adzin Pucin vyrašaje, kali jamu sychodzić. I tyja, chto zacikaŭleny ŭ jahonym "dachu", nastojliva sprabujuć raskrucić scenar pralanhacyi jahonaha caravańnia praz hulni na hlebie "bratniaj intehracyi".
Jość i inšyja čyńniki. Tak što biełaruskamu kiraŭniku peŭna jašče pasprabujuć vykrucić ruki.
I budzie novaja faza antyimperskaj rytoryki ź jahonych vusnaŭ.
Ad hetych deža-viu było b užo zusim motašna, kali b nie zaŭvažałasia źmiena anturažu.
Jon z kožnym razam stanovicca bolej dy bolej niespryjalny dla Łukašenki. Pole dla maneŭru ŭsio vuziejšaje. Resursy rastajuć, akurat jak śnieh hetaj paroj.
Biełaruskaje kiraŭnictva, što zaŭždy kazyrała maleńkim zamiežnym doŭham jak adnym z symbalaŭ samastojnaha kursu, stała šukać kredyty pa ŭsich azimutach. A što, palityka ž u nas niezdarma zaviecca šmavektarnaj :)
Interviju arabskamu spadarožnikavamu kanału taksama nie vypadkovaje. Treba damaŭlacca z bahatymi šejchami. Łukašenka adlataje ŭ Emiraty.
Jon tam byŭ, darečy, u 2000-m i navat pahladzieŭ, jak u hetaj dalokaj ad chakieju krainie hulajuć u poła.
Praŭda, dasiul šejchi nia nadta raskašelvalisia. Uschod — reč tonkaja. Miadovyja ŭśmieški jašče ni pra što nie havorać.
Ale ž krycha da krychi — źbiarecca torba. Na padtrymku biełaruskaje madeli.
Mianiać jaje, zvažajučy na "absurdnyja ŭmovy" ŭsiakich tam amerykancaŭ, ajčynnaje načalstva nie razhonicca. Heta taksama vynikaje ź siońniašniaha interviju.
Uvohule ž, kali ŭdumacca, daloka siahnuła naša vonkavaja palityka, kali praz arabaŭ Miensk musić pieradavać siabroŭskaje pryvitańnie Maskvie :)
