Z 11 pa 14 krasavika ŭ Minsku projdzie vystava «Adpačynak-2012»
U XV Mižnarodnaj turystyčnaj vystavie voźmuć udzieł bolš za 200 ekspanientaŭ z 13 krain.
U XV Mižnarodnaj turystyčnaj vystavie «Adpačynak-2012» prymuć udzieł bolš za 200 ekspanientaŭ z 13 krain. Pra heta paviedamiŭ namieśnik ministra sportu i turyzmu Česłaŭ Šulha 9 krasavika na pres-kanfierencyi ŭ Minsku.
Aficyjnaje adkryćcio vystavy adbudziecca 11 krasavika ŭ 12.00 u vystavačnym centry «Biełekspa» pa adrasie: vuł. Janki Kupały, 27. U im voźmuć udzieł ministr sportu i turyzmu Aleh Kačan i ministr kultury Pavieł Łatuška. Tematyka ekspazicyi ŭklučaje siezonny adpačynak, biźnies-tury, dziciačy adpačynak, kruizy, adukacyjnyja tury, ekskursijnyja prahramy. Taksama na vystavie buduć pradstaŭleny transpartnyja pasłuhi, spartyŭny invientar, sanatoryi, pansijanaty, damy adpačynku, turystyčnyja kłuby, haściničny servis. Akramia taho, naviedvalniki zmohuć atrymać pasłuhi strachavańnia, nabyć tavary dla adpačynku i sportu, karty, buklety i daviedniki.
Jak adznačyŭ namieśnik ministra, tradycyjna ŭ pracy vystavy ŭdzielničajuć usie krainy — susiedzi Biełarusi, Turcyja, Bałharyja, Kuba. Sioleta pavyšanuju cikavaść da Biełarusi vykazvaje Rasija, u tym liku rehijony. Najpierš rasijanie zacikaŭlenyja ŭ prachodžańni sanatorna-kurortnaha lačeńnia na terytoryi Biełarusi i adpačynku ŭ ahrasiadzibach. Taksama jość «vialikija resursy» ŭ raźvićci turyzmu pamiž Biełaruśsiu i Ukrainaj, adznačyŭ Šulha. Pavodle jaho słoŭ, abmierkavańnie mahčymaściaŭ raźvićcia turyzmu pamiž krainami adbudziecca 10–11 maja padčas pasiadžeńnia sumiesnaj kamisii pa turyźmie.
Jak paviedamiŭ Šulha, prahrama vystavy praduhledžvaje prezientacyi, kruhłyja stały, sieminary pa najbolš aktualnych prablemach turystyčnaj haliny. Sioleta asablivaja ŭvaha budzie nadadziena Niaśvižskamu pałacava-parkavamu ansamblu i Mirskamu zamku.
