Na I źjeździe Mižrehijanalnaha prafsajuza rabotnikaŭ aŭtamabilnaj pramysłovaści Rasii, jaki adbyŭsia ŭ Sankt-Pieciarburhu, asudzili cisk suprać supołki niezaležnaha prafsajuza na pradpryjemstvie «Hranit» u Mikaševičach.
Delehaty źjezda pryniali adpaviednuju rezalucyju ab padtrymcy niezaležnaha prafsajuza na «Hranicie». U dakumiencie delehaty źjezda zaklikajuć Kanfiederacyju pracy Rasii, Mižnarodnuju kanfiederacyju pracy «praciahnuć cisk na aŭtarytarny režym Biełarusi z metaj abarony bazavych pravoŭ čałavieka na pracoŭnym miescy i zabiaśpiečyć abaronu aktyvistaŭ i šarahovych siabraŭ bajavoha prafsajuza RUVP «Hranit».
Delehaty źjezda zajavili, što z hłybokaj tryvohaj i zakłapočanaściu nazirajuć «za ašalełaj kampanijaj, razhornutaj režymam Łukašenki suprać stvoranaha ŭ kancy 2011 hoda niezaležnaha prafsajuzu na pradpryjemstvie "Hranit" i jaho aktyvistaŭ u horadzie Mikaševičy».
U rezalucyi kanstatujecca, što «ŭžo šmat hadoŭ biełaruski režym viadzie lutuju vajnu suprać niezaležnaha prafsajuznaha ruchu. Z-za hetaha Biełaruś naroŭni z Mjanmaj (dzie kiruje vajennaja chunta) nieadnojčy traplała ŭ śpiecparahrafy — čornyja śpisy Mižnarodnaj arhanizacyi pracy. Niekalki hadoŭ tamu ES i ZŠA ŭviali ekanamičnyja sankcyi suprać krainy».
Pry kancy 2011 hoda niekalki socień rabotnikaŭ pradpryjemstva pa zdabyčy budaŭničaha kamieniu «Hranit» u Mikaševičach napisali zajavy, što vychodziać z aficyjnaha prafsajuza. Takim čynam jany vykazali pratest suprać pamieru zarobkaŭ, pahardlivaha staŭleńnia z boku administracyi i biaździejańnia aficyjnaha prafsajuza.
Rabočyja abviaścili, što stvarajuć na pradpryjemstvie supołki Biełaruskaha niezaležnaha prafsajuza. Adrazu ž siabry niezaležnaha prafsajuza pačali adznačać cisk z boku administracyi.
