Mazynski zdymaje film pra biełaruskuju žaleznuju łedzi — Pałutu Badunovu 1

Režysior Valery Mazynski zdymaje dakumientalna-mastacki film pra Pałutu Badunovu (1885–1938), adnaho ź lidaraŭ Biełaruskaj partyi sacyjalistaŭ-revalucyjanieraŭ dy siabra Rady i Narodnaha sakrataryjata BNR, u jakim jana była sakratarom (ministram) sacyjalnaj apieki.

U pačatku 1925 hoda Badunova viarnułasia ŭ Biełaruś, pierajechała ŭ Homiel, dzie pracavała nastaŭnicaj. U vieraśni 1937 hoda Badunova była aryštavanaja. 30 listapada Asobaja trojka NKVD BSSR vyniesła prysud — 10 hadoŭ papraŭča-pracoŭnych łahieraŭ. 25 traŭnia 1938 h. prysudžana da vyšejšaj miery pakarańnia. Rasstralanaja 29 listapada ŭ Miensku. Reabilitavanaja 21 červienia 1989 h. pastanovaj Prezidyuma Viarchoŭnaha Savietu SSSR z pryčyny adsutnaści składu złačynstva.

Na hałoŭnuju rolu dakumientalna-mastackaj kinastužki režysior zaprasiŭ homielskuju žurnalistku, čalca BAŽ Łarysu Ščyrakovu. U kinastužcy zdymajucca taksama hramadskija aktyvisty z Homiela.

«My dali jamu nazvu «Pałuta Badunova — uspomnić i nie zabyć»,

 — kaža Valeryj Mazynski. — Z samoj nazvy vynikaje, što heta zabytaje imia. Niekali jano było vielmi papularnaje i viadomaje. Navat Kupała ŭ svaich «Tutejšych» uzhadvaje jaje — «ciotka Badunova taksama jedzie na biełaj kabyle z Smalensku». Ale siońnia hetaje imia zabytaje, jak mnoha inšaha. Chaciełasia b hetuju žančynu, hetuju «žaleznuju łedzi» — jak jaje nazyvajuć mnohija navukoŭcy i historyki, jakija siońnia padymajuć archiŭnyja dakumienty, pryhadać.

Treba skazać, što ideja zrabić hety film naležyć nie mnie, a hamielčukam, u pryvatnaści — žurnalistcy i historyku Łarysie Ščyrakovaj. Jana pavodle knižki Valanciny Lebiedzievaj i pačała sama zdymać jaho. A potym źviarnulisia da mianie, vidać, jak da bolš prafiesijnaha čałavieka, kab ja ŭlez u hetuju spravu i papracavaŭ z aktorami, bo ŭ filmie mnoha rekanstrukcyi.

Značyć, u vašym filmie buduć elementy inscenizacyi?

Mazynski: Tak, bo dakumientaŭ ab Badunovaj niašmat zachavałasia. Častka, vidać, była źniščanaja. I siońnia, mabyć, nie ŭsio jašče adkapana ŭ archivach. Ja nie viedaju, kali heta budzie dazvolena. Ale toje, što ŭžo siońnia jość, havoryć pra vielmi nieardynarnuju asobu. I viedajecie, situacyja z tymi eserami tak nahadvaje siońniašniuju situacyju ŭ Biełarusi… Mnie zachaciełasia niejkim čynam zrabić hetaje paraŭnańnie. Tut takaja akaličnaść, što hetyja svarki i zvadki, jakija viečna pieraśledujuć našy palityčnyja siły i roznyja hrupoŭki, akazvajecca, byli va ŭsie časy.

Film pavinien być zakončany ŭ traŭni. Zaraz zdymajecca češski epizod žyćcia Badunovaj, buduć taksama zdymki ŭ Maskvie.

Premjera filma zapłanavana na druhuju pałovu hoda.

Pavodle Radyjo Svaboda

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH