Byłomu deputatu i palitviaźniu Siarhieju Skrabcu admovilisia pastavić dazvolny štamp u pašparcie. Pra heta palityk daviedaŭsia 14 sakavika ŭ adździele hramadzianstva i mihracyi Pieršamajskaha rajonu Miensku.
Try tydni tamu Siarhiej Skrabiec zdaŭ dakumenty, kab mieć mahčymaść vyjaždžać za miažu. Skrabcu paviedamili pra rašeńnie vusna i nie nazvali pryčyny admovy. Na jakoj padstavie pryniali takoje rašeńnie, budzie skazana ŭ piśmovym adkazie, jaki abiacajuć prysłać dniami.
Termin dazvolnaha zapisu «dla šmatrazovych vyjezdaŭ va ŭsie krainy śvietu» ŭ Siarhieja Skrabca skončyŭsia, kali jon znachodziŭsia ŭ turmie, adkul vyjšaŭ naprykancy minułaha hodu.
Nahadajem, što Siarhiej Skrabiec byŭ asudžany 14 lutaha 2006 hoda pa abvinavačvańni ŭ vymańvańni kredytu ŭ dziaržavy i prysudžany da pazbaŭleńnia voli na termin 2 hady 6 miesiacaŭ. Svaju vinu palityk tady nie pryznaŭ. Pravaabaroncy ličać prysud byłomu deputatu palityčnym. Jak byŭ deputatam, jon pravodziŭ haładoŭki pratestu z patrabavańniem vyzvalić palitviaźniaŭ i zanieści źmieny ŭ vybarčaje zakanadaŭstva, a taksama źjaŭlaŭsia arhanizataram akcyi pratestu, pryśviečanaj kancu 10‑hadovaha kiravańnia Alaksandra Łukašenki ŭ lipieni 2004 hoda.
U kastryčniku Siarhiej Skrabiec byŭ amnistavany i termin jaho pakarańnia skaraciŭsia na adzin hod. 15 listapada 2006 hoda jon vyjšaŭ na volu.
Učora ŭ byłoha deputata Siarhieja Skrabca apisali majomaść dziela pahašeńnia zapazyčanaści pierad «Biełarusbankam». Pa prysudu Viarchoŭnaha suda, Siarhiej Skrabiec musić taksama vypłacić paŭtara miljardy rubloŭ (kala 700 tysiač dalaraŭ), jakija nibyta vymaniŭ u dziaržavy ŭ toj čas, kali byŭ deputatam.
