Basmanny sud Maskvy pastanaviŭ likvidavać łahier apazicyi na Čystych prudach, jaki znachodzicca tam z 8 maja.
Sudździa Volha Sałopava, ahučvajučy rašeńnie, padkreśliła, što «parušeńnie paradku maje być spyniena nieadkładna». Paśla hetaha načalnik palicyi pa Centralnaj akruzie Maskvy Uładzimir Ladoŭski zajaviŭ, što «paradak na Čystaprudnym bulvary budzie naviedzieny ŭ samyja karotkija terminy».
Raniej hrupa žycharoŭ Čystaprudnaha bulvara Maskvy, dzie prachodzić pratestnaja akcyja «AkupajAbaj», padała ŭ sud na pratestoŭcaŭ, zajaviŭšy, što jany pavodziać siabie šumna i nie vykonvajuć sanitarnyja normy: nibyta spraŭlajuć pilnicu ŭ susiednich dvarach, a ad bijaprybiralniaŭ, jakija pastavili pratestoŭcy, idzie mocny pach.
Apazicyja ŭ svaju čarhu nie maje namieru spyniać svaju akcyju.
«My nikudy sychodzić nie źbirajemsia, bo nijakim rašeńniem suda nielha zabaranić ludziam źbiracca ŭ skvierach, parkach i na bulvarach», — skazaŭ Illa Jašyn.
Pavodle jaho słoŭ, aktyvisty hatovy «ŭ pracoŭnym paradku ŭrehulavać» usie pytańni z palicyjaj.
«Pryjdzie palicyja abo prystavy z rašeńniem suda, my jaho vyvučym, pahladzim, jakija pretenzii, i budziem u rabočym paradku ich vyrašać», — adznačyŭ Jašyn.
