Navumčyk: My chacieli b paprasić Vas prakamentavać dźvie inicyjatyvy, jakija ciapier aktyŭna abmiarkoŭvajucca ŭ palityčnym asiarodku. Pieršaja — heta zajava pałkoŭnika specnazu ŭ adstaŭcy Baradača ab inicyjatyvie stvareńnia aficerami i byłymi supracoŭnikami specsłužbaŭ «pierachodnaha ŭradu ŭ vyhnańni», i druhoje — słovy ministra zamiežnych spraŭ Litvy Aŭdroniusa Ažubalisa, cytuju: «Ja ŭžo sapraŭdy stamiŭsia ad usich planaŭ padtrymki apazycyi ŭ Biełarusi. Apazycyja padzielenaja. U jaje niama jasnaj pazycyi ŭ spravie padrychtoŭki da nastupnych vybaraŭ... Razam z našymi amerykanskimi siabrami nam treba pačać dumać pra niejkuju pierachodnuju radu. Treba stvaryć alternatyŭny centar ułady. Hetkaja paralelnaja struktura mahła b mieć rozhałas u samoj Biełarusi».
Paźniak: Tut dva pytańni. Pieršaje — pra Uładzimiera Baradača.
Ja viedaju Uładzimiera Baradača jak čałavieka vielmi prystojnaha i česnaha aficera.I voś tamu, što jon česny aficer, jon moža być padvieržany ŭpłyvu peŭnych «prahresiŭnych dumak». Prahresiŭnych, tamu što jany ŭsprymajucca, i dumaju, tut biaz hetaha nie abyšłosia.
Ale byli artykuły Janki Zaprudnika na hetuju temu i inšych[u jakich ideja takoha ŭrada była pastaŭlena pad sumnieŭ: isnuje Rada BNR i niama sensu jaje dublavać, pisaŭ doktar Zaprudnik].
Ciapier što datyčyć spadara Ažubalisa.
Ja razmaŭlaŭ z Ažubalisam, spatykaŭsia ź im, heta tałkovy, razumny čałaviek. I kaniešnie, vielmi dziŭna čuć takuju zajavu z vusnaŭ ministra zamiežnych spraŭ inšaj dziaržavy. Takoje moh skazać niejki biełaruski palityčny emihrant, heta narmalna było b— «my pavinny padumać, što rabić, jak arhanizavać i hetak dalej». Heta moh skazać Uładzimier Baradač, jon skazaŭ.
A kali heta havoryć ministar zamiežnych spraŭ Litvy, to heta vyhladaje troški dziŭna.Nu tym nia mienš jon heta skazaŭ.
Pryhadajem skandalnaje spatkańnie Łukašenki z Dalaj Hrybaŭskajcie. I tyja zajavy, jakija jana rabiła. Zrazumieła, jakuju funkcyju vykonvała prezydent Litvy. Heta vynik takoj palityki Eŭraźviazu, kali vybirajuć maleńkuju krainu, i ministar hetaj krainy kaža, što my razam z Amerykaj zrobim toje i toje.
Užo ŭ 2001 hodzie Ameryka zrabiła niešta «takoje». Vybrali pry dapamozie ambasadara Majkła Kozaka kandydaturu byłoha člena biuro CK Uładzimiera Hančaryka, absalutna nieprachadnuju.I ŭ vyniku dali mahčymaść Łukašenku zrabić «elehantnuju pieramohu». Niapravilna skazać, što hetyja ludzi na Zachadzie nie razumiejuć, što jany robiać.
Jany chočuć rabić svaju palityku — tamu što našaj niama.Kali ŭ 90-yja była palityka BNF, my nijakich dačynieńniaŭ z Zachadam nia mieli. Jany byli suprać niezaležnaści, i vykazalisia pieršyja asoby, pačynajučy ad prezydenta Buša, suprać niezaležnaści Biełarusi i Ŭkrainy. A my hetuju niezaležnaści dasiahnuli, i śćvierdzili, i vymušanyja byli nas pryznać. tamu što my byli nacyjanalnaja demakratyčnaja siła, jakaja zmahałasia za Biełaruś. I tady ich palityka nia mieła nijakaha značeńnia, chacia jany byli suprać.
Ciapier u hetaj pustacie robiacca takija dziŭnyja zajavy, takaja dziŭnaja palityka, i stvarajecca ŭ masach u Biełarusi mierkavańnie, što ich niechta vyciahnie za vałasy z hetaha bałota. Z hetaha bałota možam vyjści tolki my sami. Tolki biełarusy sami.
