Kala 10 tysiač katalikoŭ u niadzielu prajšli praz centr Minska pracesijaj Božaha Cieła, jakaja adbyvajecca ŭ stalicy ŭ apošniuju niadzielu maja.
Pracesija rušyła śledam za mitrapalitam minska-mahiloŭskim arcybiskupam Tadevušam Kandrusievičam ad kaścioła Śviatoha Rocha na Załatoj horcy pa praśpiekcie Niezaležnaści da Katedry na płoščy Svabody.
«Dla nas śviata Cieła Chrystova maje vielmi vialikaje značeńnie, tamu što kaścioł u Biełarusi na praciahu doŭhaha času dziejničaŭ u padpolli. Hetaje šeście źjaŭlajecca manifiestacyjaj našaj viery.My pakazvajem, što my jość u Biełarusi i što nas šmat. A dla maładych parafijaŭ heta adzin ź vidaŭ padtrymki, tamu što jany pierakonvajucca, što jany nie samotnyja ŭ spravie kaściolnaha budaŭnictva», – skazaŭ pres-sakratar Kanfierencyi katalickich biskupaŭ Biełarusi Jury Sańko.
Pa darozie pracesija spyniałasia kala abieliska na płoščy Pieramohi, kala Pałaca Respubliki na Kastryčnickaj płoščy i carkvy Śviatych Symona i Aleny na płoščy Niezaležnaści. Pracesiju achoŭvała milicyja, jakaja spyniali ruch mašyn na čas prachodu viernikaŭ.
U Biełarusi žyvie kala 1,5 młn katalikoŭ, jakija składajuć 15% nasielnictva, – dadaje Polskaje ahienctva presy.
0
0
0
0
0
0
