Pałata pradstaŭnikoŭ Nacyjanalnaha schodu Biełarusi pryniała ŭ pieršym čytańni zakonaprajekt «Ab Śledčym kamitecie». Dakumient pradstaŭlaŭ dyrektar Nacyjanalnaha centra zakanadaŭstva i pravavych daśledavańniaŭ Vadzim Ipataŭ.
Prajekt zakona vyznačaje
Zhodna z zakonaprajektam, na pracu ŭ SK nie moža być pryniaty «hramadzianin, jaki raniej učyniŭ złačynstva, niedziejazdolny abo abmiežavanaj dziejazdolnaści, a taksama jaki admoviŭsia ad prachodžańnia śpiecyjalna praduhledžanaj pracedury».
Supracoŭnik SK nie moža być členam palityčnaj partyi i hramadskaha abjadnańnia, jakoje maje palityčnyja mety, a taksama atrymlivać ad zamiežnych dziaržaŭ pieravahi, źviazanyja z palityčnymi pierakanańniami abo nacyjanalnaj prynaležnaściu.Zakonaprajekt praduhledžvaje, što supracoŭniki SK nie mohuć zajmać inšyja apłačvajemyja pasady, akramia tych, jakija źviazany z vykładčyckaj i navukovaj dziejnaściu.
Dakumient vyznačaje paŭnamoctvy rabotnikaŭ SK, abstaviny prymianieńnia imi fizičnaj siły, śpiecsrodkaŭ i zbroi.
U deputataŭ uźnikła šmat pytańniaŭ da vykarystanych u zakonaprajekcie farmulovak, a taksama da momantaŭ, jakija tyčacca lhot dla supracoŭnikaŭ SK, umoŭ prymianieńnia imi fizičnaj siły i zbroi, paŭnamoctvaŭ časova adbirać u hramadzian asabistyja aŭtamabili dla słužbovych metaŭ.
Adkazvajučy na pytańnie adnaho z deputataŭ nakont sacyjalnych harantyj dla supracoŭnikaŭ SK, Ipataŭ patłumačyŭ, što, pakolki kamitet farmiravaŭsia sa śledčych padraździaleńniaŭ milicyi, prakuratury i inšych orhanaŭ, u zakonaprajekcie ŭkazvajucca sacyjalnyja harantyi, jakija byli praduhledžany dla supracoŭnikaŭ hetych siłavych struktur. «Hetuju płanku harantyj my nie mahli apuścić», — padkreśliŭ Ipataŭ.
Deputat Alena Dzikavickaja ŭ svaju čarhu skazała dakładčyku: «Vam treba naniać fiłołahaŭ, kab pravilna sfarmulavać tekst, tamu što pakul tut sens mianiajecca ŭ zaležnaści ad pračytańnia».
Namieśnik staršyni Pałaty pradstaŭnikoŭ Viktar Huminski padkreśliŭ, što razhlad zakonaprajekta ŭ druhim čytańni zapłanavany na 27 červienia, tamu ŭ deputataŭ budzie mahčymaść za astatnija dva tydni ŭnieści svaje zaŭvahi i prapanovy.
Paśla hetaha zakonaprajekt byŭ pryniaty ŭ pieršym čytańni. Za pryniaćcie prahałasavali 72 deputaty, suprać — 14, ustrymalisia — 19.
