Polskija ŭłady raspačali praceduru pazbaŭleńnia vidu na stałaje žycharstva byłoha kiraŭnika pieradvybarčaha štabu Mikoły Statkieviča Siarhieja Marcaleva. Małady palityk atrymaŭ takoje prava jašče ŭ 2007 hodzie.
Voś što kaža Siarhiej Marcaleŭ:
«Praces pazbaŭleńnia mianie vidu na žycharstva jašče nie zavieršany, jon praciahvajecca. Ale farmalna ŭ mianie amal nie zastałosia času.Zaraz ja pryznačaju ŭpaŭnavažanaha, pakolki sam, budučy ŭmoŭna asudžany, vyjechać nie mahu. Budu pisać apelacyju da vyšejšych instancyjaŭ, a potym padam u sud. Mnie zusim niezrazumiełyja i padstavy takoha rašeńnia, što mianie pazbaŭlajuć vidu na žycharstva. Čamu? Pakul u mianie nia budzie ŭpaŭnavažanaha, ja nie zmahu jahonymi vačyma zazirnuć u tuju tečku — što ž jany prydumali? U papiery, na jakuju jany spasyłajucca, niama padrabiaznaściaŭ. Napisana, što na padstavie artykuła 68 zakonu ab zamiežnikach Respubliki Polšča ad 13 červienia. Bolš inspektar praz telefon mnie nijakaj infarmacyi nie paviedamiła. Skazała tolki, što moj upaŭnavažany heta zmoža pahladzieć i ja zmahu dać tłumačeńnie.
Padčas prezydenckaj vybarčaj kampanii 2010 hodu Siarhiej Marcaleŭ kiravaŭ pieradvybarčym štabam Mikoły Statkieviča. 23 śniežnia byŭ źniaty ź ciahnika, na jakim jechaŭ u Varšavu. Spačatku abvinavačvaŭsia ŭ arhanizacyi masavych biesparadkaŭ.
Asudžany sudom Zavodzkaha rajonu Miensku na 2 hady pazbaŭleńnia voli ŭmoŭna za arhanizacyju dziejańniaŭ, jakija hruba parušajuć hramadzki paradak.
Samoha Statkieviča pasadzili ŭ turmu.
Art. 67 polskaha Zakonu pra inšaziemcaŭ praduhledžvaje, što inšaziemcu admaŭlajuć u nadańni vidu na žycharstva, kali jon nie spaŭniaje ŭmovaŭ, sfarmulavanych u inšych artykułach, abo kali taho vymahajuć patreby nacyjanalnaj biaśpieki.
