Spyniena kryminalnaja sprava ŭ dačynieńni dvuch supracoŭnikaŭ Savieckaha RAUS Homiela za pieravyšeńnie ŭłady. U ich dziejańniach nie znojdziena składu złačynstva, skazali BiełaPAN va ŭpraŭleńni Śledčaha kamiteta pa Homielskaj vobłaści.
Jak paviedamlałasia raniej, 9 studzienia Śledčy kamitet raspačaŭ spravu pavodle č. 3 art. 426 KK (pieravyšeńnie ŭłady abo słužbovych paŭnamoctvaŭ) u dačynieńni da dvuch milicyjanieraŭ, jakija ŭ kastryčniku 2011 hoda pravodzili zatrymańnie supracoŭnika UDFR.
Raniej, u kancy śniežnia, milicyjaniery ŭžo byli pryciahnutyja da adkaznaści, atrymaŭšy vymovy. Da dyscyplinarnaj adkaznaści ich pryciahnuła kiraŭnictva pa vynikach pravierki, praviedzienaj upraŭleńniem ułasnaj biaśpieki (UUB). Pavodle słoŭ milicyjanieraŭ, UUB pryjšło da vysnovy, što jany nie raspačali mier na miescy dla ŭstanaŭleńnia danych supracoŭnika KDK, a taksama stvaryli pahrozu jaho žyćciu i zdaroŭju, dastaŭlajučy ŭ adździeł biez adzieńnia.
Nahadajem, incydent adbyŭsia ŭ kastryčniku 2011 hoda. Supracoŭnik upraŭleńnia departamienta finansavych rasśledavańniaŭ Kamiteta dziaržkantrolu admoviŭsia zapłacić taksistu pa ličylniku, nazvaŭšy jaho, pavodle śviedčańniaŭ samoha vadziciela i milicyjanieraŭ, «kazłom», a milicyjanieraŭ, jakija prybyli pa vykliku taksista, — «asłami». Supracoŭnika KDK dastavili ŭ adździeł milicyi dla razboru.
1 śniežnia 2011 hoda sud Savieckaha rajona Homiela razhledzieŭ u zakrytym pasiadžeńni administracyjnuju spravu ŭ dačynieńni da supracoŭnika KDK, abvinavačanaha ŭ abrazie taksista, i pryznaŭ jaho vinavatym va ŭčynieńni administracyjnaha pravaparušeńnia — naŭmysnym źnievažeńni honaru i hodnaści asoby (art. 9.3 KoAP). Vinavataha pakarali administracyjnym štrafam u 10 bazavych vieličyń (350 tys. rubloŭ). A 1 lutaha 2012 hoda Homielski abłasny sud admianiŭ rašeńnie suda Savieckaha rajona, nakiravaŭšy spravu na novy razhlad. Adnak, jak stała viadoma BiełaPAN, rajonny sud spyniŭ spravu ŭ suviazi z zakančeńniem terminu daŭnaści.
