Marek Mihalski stvaryŭ sajt u padtrymku Siarhieja Kavalenki 1

Marek Mihalski

U internecie pačaŭ pracavać sajt u padtrymku viciebskaha aktyvista Kansiervatyŭna-chryścijanskaj partyi — BNF Siarhieja Kavalenki. Cajt stvorany ofisam jeŭradeputata ad Polščy Mareka Mihalskaha.

Aprača detalovaj infarmacyi ab spravie Kavalenki i ab kampanijach, akcyjach i inicyjatyvach u padtrymku apazicyjaniera, na sajcie raźmieščana pietycyja na adras biełaruskich uład z patrabavańniem vyzvalić i reabilitavać aktyvista KCHP-BNF. Jaje aŭtarami razam ź jeŭradeputatami stali Marek Mihalski, žonka Siarhieja Kavalenki Alena i Uładzimir Bukoŭski — rasijski piśmieńnik, palityčny i hramadski dziejač, samy viadomy saviecki dysident, jaki ŭ 1960-70-ch hadach źviedvaŭ represii z boku ŭład — u turmach i na prymusovym lačeńni pravioŭ 12 hadoŭ.

Kampaniju ŭžo padtrymali niekatoryja mižnarodnyja arhanizacyi: Libereco — Partnership for Human Rights, Free Belarus Now, «Biełaruski trybunał», ahulnarasijski ruch «Za pravy čałavieka», hramadzianskaja inicyjatyva «Jeŭrapiejskaja Biełaruś».

Na sajcie freekavalenka.org možna taksama pračytać zajavy tych, chto dałučyŭsia da patrabavańnia reabilitavać i vyzvalić Kavalenku i stvaryŭ niešta nakštałt kamiteta ŭ jaho padtrymku. Na sajcie raźmieščany zajavy Iryny Bahdanavaj, staršyni hramadzianskaj kampanii Free Belarus Now, rasijskaha pravaabaroncy Lva Panamarova i Łarsa Biunhiera z Libereco — Partnership for Human Rights.

Marek Mihalski padčas kampanii, inicyjavanaj Libereco — Partnership for Human Rights, uziaŭ šefstva nad Siarhiejem Kavalenkam.

Jeŭradeputat užo niekalki miesiacaŭ patrabuje zabieśpiačeńnia miedycynskaj dapamohi i dostupu da niezaležnaha ŭrača, a taksama nieadkładnaha vyzvaleńnia i reabilitacyi viciebskaha apazicyjaniera.

***

Siarhiej Kavalenka byŭ zatrymany 19 śniežnia 2011 hoda pavodle abvinavačańnia va ŭchileńni ad adbyvańnia pakarańnia ŭ vyhladzie abmiežavańnia voli (art. 415 KK). Havorka idzie pra pakarańnie, jakoje było vyniesiena apazicyjanieru ŭ mai 2010 hoda za vyviešvańnie bieł-čyrvona-biełaha ściaha na hałoŭnaj navahodniaj jołcy Viciebska. U lutym hetaha hoda Kavalenku asudzili na dva hady i adzin miesiac pazbaŭleńnia voli ŭ kałonii ahulnaha režymu. Adrazu paśla zatrymańnia jon abviaściŭ haładoŭku pratestu, jakaja doŭžyłasia ź nievialikimi pierapynkami prykładna dva miesiacy. 18 maja Viciebski abłasny sud admoviŭsia zadavolić kasacyjnuju skarhu Siarhieja Kavalenki na prysud. U mahiloŭskuju kałoniju apazicyjanier byŭ etapavany 19 maja.

BiełaPAN

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH