Da 13 lipienia kožny achvotny moža papłavać u «hornaj race» la Ždanovičaŭ — fota 1
Adziny ŭ Biełarusi kanał dla słałama na kanoe i bajdarkach źjaviŭsia jašče ŭ 1981 h.
Adziny ŭ Biełarusi kanał dla słałama na kanoe i bajdarkach (na karcie jon znachodzicca sprava) źjaviŭsia ŭ rajonie Ždanovičaŭ u 1981 hodzie praź piać hadoŭ paśla ŭviadzieńnia ŭ ekspłuatacyju Vilejska-Minskaj vodnaj sistemy. Kanał źjaŭlajecca padabienstvam hornaj raki sa štučnymi bietonnymi vałunami. Ale, u adroźnieńnie ad hornaj raki, vada tut nie takaja chałodnaja. Akramia spartyŭnaha pryznačeńnia kanał pavinien byŭ ažyćciaŭlać pratoku vady ź Minskaha mora ŭ rajonie ŭradavaj rezidencyi «Zasłaŭje», dzie vadaschovišča ŭtvaraje zaliŭ.
Da pačatku 1990-ch hadoŭ vada ŭ kanale ciakła pastajanna. Karystajučysia mahčymaściu papłavać u burnym patoku, siudy pryjazdžali padletki z usiaho Minska.
Zatym u «Minskvodakanale» navučylisia ličyć hrošy, i vadu ŭ kanale pierakryli. Sprava ŭ tym, što praktyčna ŭsia vada ŭ Minskim mory — z kanała Vilejska-Minskaj vodnaj sistemy. Hetaja sistema spažyvaje šmat elektraenierhii. Tamu ciapier vadu ŭ kanał puskajuć tolki na čas trenirovak i spabornictvaŭ.
U hetyja haračyja dni jakraz i prachodziać takija treniroŭki dva razy na dzień: z 9.00 da 11.00 i z 16.30 da 18.30. Karystajučysia mahčymaściu, razam sa spartsmienami tut trenirujucca i amatary, jakija pryjazdžajuć sa svaim ryštunkam.
Z-za šurpataha bietonu kanała płavać pa im nieabchodna ŭ abutku. Nie lišnimi buduć i palčatki. Bajacca burnaha patoku nie varta — vostrych kamianioŭ tut niama, daŭžynia kanała nievialikaja, hłybinia — prykładna 150–170 sm, jość niekalki miescaŭ, adkul možna vybiracca na bierah. Treniroŭki spartsmienaŭ buduć prachodzić da 13 lipienia.
