Arhanizatary «plušavaha desantu» zajaŭlajuć ab niedatyčnaści da akcyi Antona Surapina 9

Arhanizatary «plušavaha desanta», pradstaŭniki pijar-kampanii Studio Total, zajaŭlajuć ab niedatyčnaści da akcyi biełaruskaha fatohrafa Antona Surapina, zatrymanaha Kamitetam dziaržbiaśpieki.

Nahadajem, što 20-hadovy student Instytuta žurnalistyki BDU, jaki pieršym raźmiaściŭ na svaim sajcie Belarusian News Photos fatahrafii plušavych miadźviedziaŭ, skinutych 4 lipienia sa šviedskaha samalota nad Iviancom i Minskam, byŭ zatrymany 13 lipienia. U dačynieńni da Antona zaviedzienaja kryminalnaja sprava, jon padazrajecca ŭ dapamahańni niezakonnamu pierasiačeńniu miažy. Surapinu pahražaje da siami hadoŭ pazbaŭleńnia voli. Fatohraf śćviardžaje, što zdymki plušavych miedźviedzianiataŭ jamu dasłaŭ pa elektronnaj pošcie nieviadomy čałaviek.

«My i raniej kazali pra toje, što napiaredadni akcyi ŭ nas nie było nijakich kantaktaŭ ni z kim z pradstaŭnikoŭ Biełarusi. Naturalna, u nas nie było nijakich kantaktaŭ i z Antonam»,

— zajaviŭ u intervju BiełaPAN Tomas Mazeci, jaki razam sa svajoj kalehaj Chanaj Linaj Frej kiravaŭ samalotam padčas akcyi.

Pavodle jaho słoŭ, u bližejšyja dva-try dni arhanizatary akcyi vystupiać z aficyjnaj zajavaj z hetaj nahody. «Jana budzie adrasavana, u tym liku, biełaruskim uładam. Bolš za toje, my hatovyja adkazać na ŭsie pytańni biełaruskich śledčych, kali jany pryjeduć u Šviecyju», — skazaŭ Mazeci.

Jon taksama nie viedaje, chto moh adpravić Antonu Surapinu fatahrafii ź miedźviedzianiatami. Arhanizatary akcyi hetaha nie rabili dakładna, padkreśliŭ Mazeci.

«Ale padumajcie sami: my skinuli niekalki sotniaŭ miedźviedzianiataŭ, i ja sam bačyŭ, što mnohija ludzi ich fatahrafavali. Adasłać fatahrafii Antonu moh luby ź ich», — dadaŭ pradstaŭnik kampanii Studio Total.

***

Anton Surapin utrymlivajecca ŭ śledčym izalatary KDB. Da 23 lipienia jamu pavinna być pradjaŭlena abvinavačvańnie. Artykuł 371 č. 3 KK, pavodle jakoha jon padazrajecca (naŭmysnaje niezakonnaje pierasiačeńnie dziaržaŭnaj miažy Respubliki Biełaruś, ździejśnienaje arhanizavanaj hrupaj asob), praduhledžvaje pakarańnie ŭ vyhladzie pazbaŭleńnia voli ad troch da siami hadoŭ z kanfiskacyjaj abo biez kanfiskacyi majomaści.

Varta adznačyć, što aficyjny Minsk spačatku admaŭlaŭ fakt parušeńnia zamiežnym samalotam pavietranaj prastory Biełarusi. Paśla hetaha arhanizatary akcyi, raźmiaścili ŭ internecie videazapis svajho palotu nad Biełaruśsiu, a zatym vystupili z zajavami ab tym, što pry padrychtoŭcy da akcyi jany nie kantaktavali ni z kim z pradstaŭnikoŭ Biełarusi.

Hetaja historyja atrymała šyroki hramadski rezanans i dała padstavu sumniavacca ŭ bojehatoŭnaści biełaruskaj SPA. Zaraz kamisija Łukašenki pravodzić pravierku ŭsich złučeńniaŭ i vajskovych čaściej Vajenna-pavietranych sił i vojskaŭ supraćpavietranaj abarony.

BiełaPAN

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH