Hienadź Palčyk raspačaŭ pieradvybarčuju kampaniju zadoŭha da vybaraŭ. Pieršaja sustreča z patencyjnymi prychilnikami adbyłasia jašče ŭ traŭni. A na minułym tydni pa Jasieninskaj akruzie była zarehistravana jahonaja inicyjatyŭnaja hrupa. Jaje kolkaść uražvaje — 214 supracoŭnikaŭ śfiery adukacyi.
Hienadź Palčyk źjaŭlajecca dyrektaram Nacyjanalnaha Instytuta adukacyi, raniej byŭ dyrektaram Liceja BDU.Jon taksama źjaŭlajecca navukovym kiraŭnikom padprahramy «Humanitarnyja navuki jak faktar raźvićcia biełaruskaha hramadstva i dziaržaŭnaj ideałohii» na 2011–2015 hady.
25 traŭnia nastaŭnikaŭ minskaj himnazii № 61 sabrali ŭ aktavaj zale, na jakoj Palčyk zajaviŭ pra svaje palityčnyja ambicyi i raspavioŭ pra novyja piedahahičnyja raspracoŭki jahonaha instytuta.
Pra jahonyja dasiahnieńni ŭ červieni pisała «Narodnaja hazieta», a taksama «Viačerni Minsk». U apošniaj adznačałasia:
«Hienadź Palčyk kiruje nie prostanavukova-daśledčym instytutam, a cełaj halinoj sistemy adukacyi. Kalehi nazyvajuć jaho čałaviekam z razmacham. Jon nie baicca pieraŭtvareńniaŭ i zdolny vysłuchać roznyja, navat samyja śmiełyja prapanovy».
Zaraz jahonaja inicyjatyŭnaja hrupa zarehistravana pa Jasieniskaj vybarčaj akruzie № 100 u Minsku. Pavodle naziralnikaŭ, navat čalcy kamisii ździvilisia kolkasnamu składu hrupy — 214 čałaviek, ź ich tolki dva čałavieki — kalehi pa instytucie, astatnija — nastaŭniki minskich škoł, vykładčyki BDU.
Razam ź inicyjatyŭnaj hrupaj Palčyka pa hetaj akruzie zarehistravana hrupa staršyni partyi AHP Anatola Labiedźki i staršyni Minskaj haradskoj arhanizacyi partyi «Spraviadlivy śviet» Iny Palohieńkaj.
Nahadajem, što pavodle Vybarčaha kodeksu Respubliki Biełaruś ahitacyja pavinna pačynacca ad momantu rehistracyi kandydata i skančvacca za adzin dzień da vybaraŭ — 22 vieraśnia.
