Usie zdymki možna pabačyć na staroncy BAŽ u fejsbuku.
Adna z kaardynataraŭ akcyi kaža, što paŭdzielničała ŭžo bolš za try dziasiatki čałaviek. Amal usie jany žurnalisty.
Akcyja pačałasia ŭ sacyjalnych sietkach, kali biełaruskija žurnalisty vyrašyli padtrymać svajho kalehu. Anton Surapin z 13 lipienia ŭtrymlivajecca ŭ izalatary KDB, jaho abvinavačvajuć u spryjańni ŭ niezakonnym pierasiačeńni miažy Biełarusi. Anton pieršym raźmiaściŭ na svaim sajcie Belarussian News Photos fotazdymki miadźviedzikaŭ z zaklikami da svabody, jakija skinuŭ na terytoryi Biełarusi samalot švedzkaha reklamnaha ahienctva Studio Total. Ciapier jamu pahražaje ad troch da siami hadoŭ turmy.
U fota-akcyi padtrymki pad słohanam «Sami pra...li, sami adkazvajcie. Svabodu žurnalistu!» užo paŭdzielničali žurnalisty roznych ŚMI — ad telekanału «Biełsat» da «Kamsamolskaj praŭdy».
Adzin ź ich — žurnalist i fatohraf internet-vydańnia «Salidarnaść» Siarhiej Bałaj: «Anton — moj siabar. I vielmi dobry siabar. My ź im razam pracavali ŭ roznych sytuacyjach, abstavinach, na roznych mierapryjemstvach. U mianie vyklikaje, miakka kažučy, niedaŭmieńnie toje, što jaho zatrymali ŭ suviazi z „plušavym desantam“. Heta čałaviek, jaki absalutna nijak nie spryčyniŭsia da hetaj akcyi, a prosta raźmiaściŭ zdymki. Jak fatohrafa mianie heta vielmi aburaje. Na jaho miescy moh apynucca luby z nas — prykładaŭ chapaje».
Sapraŭdy, siarod tych žurnalistaŭ, jakija sfatahrafavalisia ŭ padtrymku Surapina, jość i tyja, kaho zatrymlivali padčas vykanańnia prafesijnych abaviazkaŭ, jak žurnalista «Eŭraradyjo» Alesia Pileckaha. I tyja, chto adsiedzieŭ administracyjnyja terminy, jak žurnalist Siamion Piečanko i videaaperatar Alaksandar Barazienka.
Padčas apošniaha fatasetu dadalisia 11 fatazdymkaŭ. Siarod inšych na ich reklamistka Julija Laškievič, błohierka Aryna Lisieckaja, fatohraf Andrej Lankievič.
Andrej Lankievič: «Mnie zdajecca, zaraz toj momant, kali treba vykazvacca. Čałavieka „zabrali“ na padstavie jahonaj prafesijnaj dziejnaści. Kali zaraz nie havaryć, to adbudziecca ź im toje, što adbyvajecca, jak my ŭsie viedajem, z palitykami: jon moža va ŭsim pryznacca, pierastać pracavać, i tak dalej, i tak dalej. Zaraz samy momant havaryć pra heta. Nie było ŭ mianie dumak navat, dałučacca ci nie».
Akcyja adbyvajecca pad dziorzkim słohanam «Sami pra...li, sami adkazvajcie. Svabodu žurnalistu!» Čamu jon byŭ abrany i jak staviacca da jaho ŭdzielniki? Kaardynatarka akcyi kaža, što hetaja ideja źjaviłasia, kali Anton siadzieŭ jašče tolki niekalki dzion: «Nam chaciełasia vielmi zrazumiełym i žorstkim čynam vykazać svajo staŭleńnie. Tam stajać „zorački“ — kožny moža padstavić u ich svaje litary. Ale z ulikam metadaŭ, jakimi dziejničajuć ułady — pahražać siamiu hadami turmy žurnalistu, jaki prosta raźmiaściŭ zdymki na sajcie, — prosta listami ŭ prakuraturu tut nie dapamožaš. Nam padałosia, što takija słovy tut da miesca».
Fatohraf Andrej Lankievič ličyć, što heta mova, jakuju «ŭsie razumiejuć»: «U hetym słohanie jość usio i ničoha nia treba tłumačyć: što adbyvajecca, jak my da hetaha stavimsia i što treba rabić».
Žurnalisckaja akcyja ŭ padtrymku Antona Surapina šyroka abmiarkoŭvajecca ŭ sacyjalnych sietkach, pra jaje paviedamili šmat jakija biełaruskija medyi, časopis «Russkij rieportier». Kanał «Eŭrańjuz» raspačaŭ svoj repartaž pra aryšt Antona Surapina z kadraŭ fatasesii žurnalisckaj salidarnaści.
