Apazicyja vykarystoŭvaje zajezdžanuju płaścinku ab nielehitymnaści vybaraŭ, kab apraŭdać svaju śviadomuju parazu. Pra heta zajaviŭ Alaksandr Łukašenka, razmaŭlajučy 9 žniŭnia z žurnalistami ŭ Astravieckim rajonie.
Na dumku Łukašenki, apazicyja katory raz vykarystoŭvaje adnu i tuju ž taktyku pry praviadzieńni vybarčaj kampanii, pryčym hetaja płaścinka nastolki zajezdžanaja i nastolki nadakučyła, što za ich dziejańniami ŭžo sočać chiba što tolki žurnalisty, bo heta ŭvachodzić u ich prafiesijnyja abaviazki.
Łukašenka miarkuje, što takim čynam apazicyja sprabuje apraŭdać svaju śviadomuju parazu na vybarach.«Kali b siońnia naša piataja kałona z apazicyjaj adčuvali, što jany pieramohuć, tady nie kazali b, što vybary nielehitymnyja, bo tady i jany byli b nielehitymnymi. A raz tak kažuć, značyć, jany razumiejuć, što ŭ hetaj situacyi jany pralaciać jak faniera nad Paryžam», — skazaŭ jon.
«Jakuju taktyku jany vybieruć — heta ich myškavańnie, i źviazana jano tolki z adnym (inšaha, treciaha — niama) — atrymać hrošy, choć maleńkija, ciapier Zachad mała im daje, — skazaŭ Łukašenka.— Choć by hetuju dolu im daŭ Zachad, jany hatovyja tut šumieć, kryčać, padryvać, stralać, što zaŭhodna rabić — heta ich palityka. Heta viedajuć usie. Užo prosty narod heta viedaje».
Łukašenka miarkuje, što ŭ ciapierašniuju vybarčuju kampaniju tak i nie źjavilisia alternatyŭnyja kandydaty z boku apazicyi — zastalisia «usio tyja ž asoby, zamyzhanyja, zamusolenyja, jakija jeździli i zdradžvali krainie i trucili narod. Hetyja zamyzhanyja asoby znoŭ prosiacca va ŭładu i jasna, jakuju palityku jany buduć pravodzić».
Łukašenka taksama zakranuŭ temu acenki vybaraŭ u Biełarusi z boku mižnarodnych naziralnikaŭ.«Zaprasili, jak vy bačycie, usich hetych nahladčykaŭ, chto byŭ i chto nie byŭ u nas, chaj hladziać. My viedajem, što jany napišuć. My ŭžo pieršyja dakłady ich atrymlivajem. Jašče vybaraŭ niama, a my ŭžo pračytali», — skazaŭ jon.
Łukašenku acenka takich naziralnikaŭ zahadzia viadomaja. «My viedajem, što jany buduć nas daŭbać,jak by ni praviali hetyja vybary, ale my idziem na heta, bo my adkrytyja: idzicie i hladzicie», — zajaviŭ jon.
