Dva hady tamu, 3 vieraśnia 2010 hoda, na ŭłasnym leciščy ŭ vioscy Piarchurava pad Minskam byŭ znojdzieny paviešanym zasnavalnik apazicyjnaha sajta Charter97.org Aleh Biabienin.
Śledstva ŭ jakaści papiaredniaj pryčyny śmierci žurnalista adrazu ž abrała samahubstva. Siabry i paplečniki zahinułaha, siarod ich Andrej Sańnikaŭ, Mikałaj Chalezin, Źmicier Bandarenka, hetuju viersiju pastavili pad sumnieŭ. Vyśviatlalisia novyja akaličnaści spravy, u siabroŭ Aleha raśli padazreńni i sumnievy. Ale śledstva prytrymlivałasia pieršapačatkovaj linii.
Zahadkavaja śmierć pamočnika adnaho z pretendentaŭ na pasadu prezidenta [Andreja Sańnikava] pierad pačatkam vyrašalnaj stadyi vybarčaj kampanii na karotki momant abjadnała biełaruskuju apazicyju. Raźvitacca ź im pryjšli lidary partyj i ruchaŭ, hramadskija dziejačy.
Sprava Biabienina mieła mižnarodny rezanans. Pra jaho tajamničuju śmierć pisali zamiežnyja ŚMI, kiraŭnik Jeŭraparłamienta zaklikaŭ pravieści abjektyŭnaje rasśledavańnie akaličnaściaŭ śmierci žurnalista.Ź imi salidaryzavalisia inšyja jeŭračynoŭniki. Biełaruskija ŭłady zaprasili da ŭdziełu ŭ rasśledavańni ekśpiertaŭ-kryminalistaŭ z krain — členaŭ ABSIE. U listapadzie 2010 h. jany apublikavali vyniki svajoj pracy ŭ Biełarusi. Jany pryjšli da vysnovy, što žurnalist skončyŭ žyćcio samahubstvam.
Prakuratura Minskaj vobłaści, jakaja pravodziła rasśledavańnie, abviaściła pryčynaj śmierci Biabienina samahubstva.
***
Aleh Biabienin naradziŭsia ŭ 1974 hodzie. Skončyŭ fakultet žurnalistyki Biełaruskaha dziaržaŭnaha univiersiteta. U 1990-ja hadach pracavaŭ namieśnikam hałoŭnaha redaktara niedziaržaŭnaj haziety «Imia». Zasnavaŭ u 1998 hodzie sajt charter97.org i byŭ jaho kiraŭnikom. U jaho zastalisia žonka i dvoje synoŭ.
