Siońnia ŭ ofisie Biełaruskaj asacyjacyi žurnalistaŭ daviałosia ŭdzielničać u maleńkaj ŭračystaści. Dyplom BAŽu "Za addanaść prafesii" ŭručyli siabru arhanizacyi, palitolahu i žurnalistu Valeru Karbaleviču.
Z hetaje nahody vaš pakorlivy słuha raspavioŭ prysutnym, jak musiŭ niekali ŭvieści "limit na Karbaleviča".
Ale pra heta trochi nižej. A zaraz kolki słoŭ pra vinoŭnika ŭračystaści. Hałoŭny redaktar "SN+" Vasil Zdaniuk ličyć jaho fenomenam. Miarkujcie sami: voś užo 10 (propisam: dziesiać!) hadoŭ Valer Karbalevič štotydzień vystupaje ŭ hetym vydańni z palitalahičnym artykułam pad svajoj aŭtarskaj rubrykaj. Nie zvažajučy na vandroŭki, asabistyja spravy ci spartovyja traŭmy (Valer — zaciaty futbalist). Nabiehła kala paŭtysiačy artykułaŭ!
Uvohule ž jahonaje imia štodnia fihuruje ŭ peryjodykach, na palityčnych sajtach i ŭ etery. Imia — naraschvat.
"Takoje ŭražańnie, što čałaviek pracuje biez vychodnych i adpačynkaŭ", — kaža Zdaniuk. Vyhladaje na toje, što heta blizka da praŭdy. Aŭtar hetych radkoŭ i sam nie adnojčy telefanavaŭ Karbaleviču i pozna ŭviečary, i ŭ niadzieli. I pra što ni zapytajsia — surazmoŭca, jak kažuć žurnalisty, u temie. Jahonyja daścipnyja kamentary nie adnojčy dapamahali aŭtaru hetaha błohu bolej vyrazna padać toj ci inšy haračy palityčny siužet.
Ci varta lišni raz kazać, što palityčnaja analityka ŭ našych palestynach — nialohki chleb?
Heta na hniłym Zachadzie niezaležnyja analityčnyja centry ŭ pašanie. Im zamaŭlajuć daśledavańni, ź ich rekrutujuć kadry (jarki prykład — karjera Kandalizy Rajs). U nas niezaležnuju analityku vyciskajuć u andehraŭnd i emihracyju (jak NISEPD). "Nadta razumnyja" nie ŭ pašanie.
Jość i niebiaśpieka inšaha kštałtu — mižvoli pieratvarycca ŭ pałymianaha revalucyjnaha publicysta, źbicca na ahitki "suprać režymu". Valer Karbalevič imkniecca da abjektyŭnaści, da sumlennych acenak nie zvažajučy na asoby (ci partyi). A heta časta stavić miž dvuch ahnioŭ, bo peŭnyja vysnovy nie da spadoby ni ŭładzie, ni tytulnaj apazycyi.
Dla mianie Valer Karbalevič jašče i prykład persanalnaje palityčnaj evalucyi dy biełarusizacyi. My paznajomilisia padčas harbačoŭskaj pierabudovy. Tady sapraŭdy byŭ čas, jaki kruta mianiaŭ samaśviadomaść (zrešty, tolki tych, chto chacieŭ dumać svajoj hałavoj). Jon, kandydat navuk (vykładaŭ, miž inšym, na katedry historyi KPSS!), prynios artykuł na temu demakratyzacyi ŭ redahavanuju mnoju tady hazetu "Znamia junosti".
Nieŭzabavie dacent Karbalevič adnym ź pieršych u svajoj VNU staŭ čytać lekcyi na biełaruskaj movie. Zaraz jon niazmušana viadzie analityčnyja etery na biełaruskaj "Svabodzie".
Uvohule ž siońnia Valer Karbalevič — adzin z samych jarkich ajčynnych analitykaŭ.
...U 2003-m mnie daviałosia ŭ jakaści hałoŭnaha redaktara raspačynać internet-prajekt "Biełaruskija naviny". Imknulisia rabić vostraje vydańnie, ale bieź mitynhovaha patasu — tak, kab enerhietyku vyznačała vastrynia dumki. Chłopcy z redakcyi adrazu ž stali žorstka ekspluatavać biezadmoŭnaha Karbaleviča. Zručna: ekspromtam daść taki składny kamentar na lubuju temu, što zastajecca tolki źniać tekst z dyktafona — i, ličy, hatovy artykuł!
Voś tady redaktarskaj volaj ja i ŭstalavaŭ "limit na Karbaleviča". Kab nia bolej dvuch razoŭ na tydzień cytavali. Biassprečna, kažu, kamentary bliskučyja, ale ž treba, chłopcy, mieru viedać... Dajcie čałavieku choć duch pieravieści!
A ŭvohule, jak žartuje Valer, ciažka kamentavać palityku, kali ŭ krainie jaje pa vialikim rachunku niama! Jon maryć dačakacca taje pary, kali ŭ Biełarusi pačniecca narmalovaje, paŭnavartasnaje palityčnaje žyćcio.
A pakul što Karbalevič štotydzień piša ŭ "SN+" pad firmavaj rubrykaj "Dyjahnaz" :)
