Rekanstrukcyja bolšaj častki histaryčnaha centra Minska budzie zavieršana ŭ 2013 hodzie, pra heta paviedamiŭ siońnia Alaksandru Łukašenku ŭ čas naviedvańnia mastackaj halerei Michaiła Savickaha staršynia harvykankama Mikałaj Ładućka.
Pavodle słoŭ Ładućki, u histaryčnaj častcy Minska zavieršana rekanstrukcyja 114 abjektaŭ, bolš jak 70 uviedziena ŭ ekspłuatacyju, da kanca 2012 hoda płanujecca ŭvieści jašče 7 abjektaŭ. Prajekt detalovaha płana rekanstrukcyi, restaŭracyi, adnaŭleńnia i dobraŭparadkavańnia histaryčnaha centra Minska Łukašenka ŭzhadniŭ u 2005 hodzie. Hetyja raboty viaducca na terytoryi płoščaj 115 ha.
Paśla čempijanatu śvietu pa chakieju, jaki biełaruskaja stalica budzie prymać u 2014 hodzie, płanujecca pačać adnaŭleńnie Minskaha zamčyšča, a mienavita budzie sfarmiravany archieałahičny muziej, muziej historyi horada, adnoŭlena rečyšča raki Niamiha.
Łukašenka taksama byŭ prainfarmavany ab płanach pa stvareńni novaha minskaha mikrarajona Zialony Bor. Jon raźmieścicca ŭ rajonie pasiołka Kałodziščy. Jak raskazaŭ Łukašenka, tut płanujecca prymianić novuju schiemu zabudovy: amal 35% damoŭ buduć vyšynioj da dziesiaci pavierchaŭ, stolki ž — čatyroch- i piacipaviarchovyja, astatnija — nizkapaviarchovyja. Budaŭnictva mikrarajona pačniecca ŭžo ŭ 2013 hodzie.
Alaksandr Łukašenka ličyć, što pašyrać Minsk bolš nie treba, nieabchodna asvojvać terytoryi ŭnutry horada, jakija nieefiektyŭna vykarystoŭvajucca. «Minsk treba rabić utulnym domam dla haradžan», — skazaŭ jon.
