Rasiejski finansava‑pramysłovy sajuz «Sibkonkord» abvieściŭ pra svaje plany pryniać udzieł u pryvatyzacyi cementavaj haliny ŭ Biełarusi, paviedamlaje rasiejskaje vydańnie «Kommiersant'»
Zaviazvać kantakty ź biełaruskimi vytvorcami cementu «Sibkonkord» pačaŭ jašče 5 hadoŭ tamu. U lipieni 2002 h. kampanija zaklučyła damovu ab sumiesnaj dziejnaści ź «Biełaruskim cementnym zavodam» u Kaściukovičach. Damova praduhledžvała stvareńnie sumiesnaha handlovaha domu dla realizacyi biełaruskaha cementu na rasiejskim rynku. Tady prajekt nia byŭ realizavany. Hetym razam, pa słovach kiraŭnika FPS «Sibkonkord» Aleha Šarykina, intares kampanii siahaje na ŭsiu biełaruskuju cementavuju halinu.
Paŭdzielničać u mahčymaj pryvatyzacyi cementavaj pramysłovaści ŭ Biełarusi «Sibkonkordu» prapanavaŭ hubernatar Kiemieraŭskaj vobłaści Aman Tulejeŭ, viadomy pryjaznymi adnosinami da biełaruskaha kiraŭnika. Kiemieraŭskaja vobłaść zaklučyła z kampanijaj damovu ab sacyjalna‑ekanamičnym supracoŭnictvie ŭ 2007 h.
FPS «Sibkonkord» — cementavy chołdynh, utvorany ŭ 2004 h. U minułym hodzie pradpryjemstvy chołdynhu vyrabili 4,38 młn t cementu, da 2010 hodu planujecca vyrablać 9 młn t. Dla paraŭnańnia — mahutnaść «Biełaruskaha cementnaha zavodu» u Kaściukovičach składaje 850 tys. t pradukcyi ŭ hod.
