Učora, 19 vieraśnia, na ofisie «Viasny», darečy, daŭno apisanym milicyjaj, ale jaki praciahvaje pracavać, adbyłasia fotasiesija. Pravaabaroncy zdymalisia ź vinšavalnymi płakatami i paštoŭkami, adrasavanymi staršyni «Viasny» Alesiu Bialackamu. Ideju padkazała fatohraf Julija Daraškievič, jakaja listujecca z Alesiem Bialackim dy šmat z kim jašče z palitviaźniaŭ. Karespandent nahadała, što sotni ludziej, u tym liku represavanych za ŭdzieł ŭ padziejach 19 śniežnia 2010, atrymali dapamohu praz «Viasnu», jakoj kiravaŭ Aleś Bialacki. Kali navat častka hetych ludziej voźmie ŭdzieł u akcyi, atrymajecca pavažny strumień dobrych emocyj, ličyć Julija Daraškievič.
Pavał Sieviaryniec, jaki adbyvaje «chimiju» ŭ Pružanskim rajonie, kaža pra toje, što listy z voli dajuć mahčymaść viaźniu pašyryć koła kantaktaŭ. Heta asabliva važna i nieabchodna dla intelihientnaha čałavieka, bo vakoł jaho ŭ kałonii sabranyja ludzi samaha roznaha sacyjalnaha ŭzroŭniu, tamu časta brakuje narmalnych kantaktaŭ. Jość i jašče adna pryčyna, ź jakoj Pavał zaklikaje pisać Alesiu Bialackamu.
«Vialikaja kolkaść listoŭ na zonie — heta pakaźnik vysokaha statusu. Kali ŭ ciabie na voli šmat siabroŭ, značyć, ty, jak kažuć, surjozny čałaviek. I kali takuju kolkaść listoŭ bačać achoŭniki, jany, naturalna, z bolšaj pavahaj staviacca da viaźnia».
Žonka Alesia Bialackaha Natalla Pinčuk 19 vieraśnia atrymała ad muža list, ź jakoha zrabiła vysnovu, što «vinšavalny tydzień» užo pačaŭ dziejničać.
«Aleś napisaŭ, što ŭžo da jaho pačali prychodzić vinšavańni. Prykładam, skazaŭ, što atrymaŭ vinšavańnie ad Lavona Barščeŭskaha».
Arhanizatary «vinšavalnaha tydnia» zaklikali ludziej dasyłać Alesiu nie tolki vinšavalnyja paštoŭki na jahony turemny adras, ale i telehramy ŭ dzień narodzinaŭ, 25 vieraśnia. Jašče adnoj formaj vinšavańnia jość pasłańnie na peŭny elektronny adras. Vałanciory biarucca potym adasłać jaho Bialackamu ŭ vyhladzie lista. Pravaabaronca Nasta Łojka, adna z arhanizataraŭ «vinšavalnaha tydnia», padzialiłasia płanami:
«Taksama my zaklikali ludziej źmiaščać vinšavańni ŭ sacyjalnych sietkach. Naprykład, Alaksiej Janukievič užo vyviesiŭ u siabie na fejsbuku zdymak ź vinšavańniem Alesia. Spadziajemsia, heta budzie pašyracca. A potym my raźličvajem častku hetych zdymkaŭ pakazać astatnim».
