Ale ci skončyłasia sprava ab miadźviedzikach hetak ža paśpiachova dla ŭsich, kaho jana zakranuła?
8 kastryčnika znoŭ pačaŭ zaniatki na žurfaku fatohraf Anton Surapin, jakomu ŭletku daviałosia amal miesiac adbyć u izalatary KDB u jakaści fihuranta spravy ab «plušavym desancie», paviedamlaje radyjo «Svaboda». Paśla vyzvaleńnia Anton Surapin žyŭ u Słucku, bo nia mieŭ prava źjaždžać u Miensk, potym prachodziŭ studenckuju praktyku i paralelna šukaŭ žytło ŭ stalicy, a jak znajšoŭ, niečakana zachvareŭ. Siońnia Anton pryjšoŭ na zaniatki i z zadavalnieńniem daviedaŭsia, što da jaho nichto nie vystaŭlaje pretenzij, choć usie, uklučna z vykładčykami, viedajuć pra jahonyja pryhody:
«Adna vykładčyca raspaviała, što ŭ toj čas była ŭ Niamieččynie i, pabačyŭšy siužet pra mianie pa „Eŭrańjus“, ledź z kresła nie zvaliłasia. Što niama pretenzij — dyk jakija mohuć być pretenzii? Historyja adbyvałasia ŭletku, kali ŭ mianie byli vakacyi. Što da idealahičnych razmoŭ, to i ich pakul nie było».
Śledčyja KDB aryštavali chłopca pavodle padazreńniaŭ u dapamozie švedam, jakija 4 lipienia na lohkamatornym samalocie pierasiekli biełaruska-litoŭskuju miažu i za dźvie hadziny palotu nad Biełaruśsiu skinuli, jak jany śćviardžajuć, 800 cacačnych miadźviedzikaŭ ź plakatami ŭ abaronu svabody słova. Padstavaj, kab abvinavacić Surapina, stała toje, što heta jon pieršy raźmiaściŭ na svaim sajcie fatazdymki miadźviedzikaŭ, znojdzienych u Biełarusi, a mienavita — u haradzkim pasiołku Ivianiec. Paźniej stała viadoma, što fatazdymki ivianieckich plušavych mišak dasłała studentu jahonaja znajomaja ź Ivianca Kacia Skurat. Paśla aryštu Antona Surapina źjaviłasia infarmacyja, što dziaŭčynu šmat hadzin dapytvali śledčyja KDB. Paźniej svajaki dziaŭčyny zajavili, što nijakaha dopytu nie było, i paprasili žurnalistaŭ bolš ich nie turbavać. Kali ŭ siaredzinie žniŭnia Anton Surapin vyzvaliŭsia ź izalatara KDB, to publična prapanavaŭ Kaci Skurat ažanicca. Miarkujučy pa ŭsim, hetaja tema, adnak, nie atrymała svajho raźvićcia:
«Dla mianie heta samaja balučaja tema, heta adzinaje, za što ja vielmi mocna kryŭduju va ŭsioj hetaj historyi. Prosta nie chaču pra heta razmaŭlać. Bo ŭ mianie pačynajecca depresija i apatyja, kali ja pačynaju dumać i razmaŭlać pra hetuju dziaŭčynu».
Što da samoj spravy, to Antona Surapina za čas paśla vyzvaleńnia z KDB nivodnaha razu na dopyty nie vyklikali, adnak jon zastajecca pad padpiskaj pra niavyjezd.
Druhi fihurant spravy, jakoha taksama abvinavacili ŭ sadziejańni švedam, — ryełtar Siarhiej Bašarymaŭ. Heta praź jaho švedy sprabavali naniać u Miensku kvateru. Siarhiej Bašarymaŭ, jak i Anton Surapin, taksama bolš za miesiac adbyŭ u izalatary KDB i vyzvaliŭsia z «amerykanki» pad padpisku pra niavyjezd.
Siabroŭka Siarhieja Iryna Łahojka pa-raniejšamu adkazvaje za Siarhieja, bo svaich kantaktaŭ žurnalistam jon tak i nie pieradaŭ: «Pracuje, usio ź im jak było raniej. Zastajecca padpiska pra niavyjezd. Na dopyty nie vyklikajuć. Byccam zabylisia. Moža, heta i dobra».
Aŭtary sensacyi — švedy ź pijar-kampanii «Studio Total» — u Biełaruś na dopyt, jak patrabavaŭ KDB, tak i nie pryjechali, i ŭ Švecyi ź biełaruskimi śledčymi taksama nie sustrakalisia. Heta paćvierdziŭ «Svabodzie» Per Kromveł, jaki 4 lipienia zdymaŭ na videa palot nad Iviancom svaich kalehaŭ Tomasa Mazeci i Chany Frej. U KDB nia kažuć, kali budzie zavieršana raśśledavańnie.
Presavy sakratar KDB Alaksandar Antanovič: «Nie hatovy pra heta ničoha skazać. Hetyja prablemy budzie vyrašać śledztva. Kali što, my paviedamim, bo razumiejem cikaŭnaść da hetaj spravy».
Na minułym tydni, 4 kastryčnika, byŭ adpraŭleny ŭ zapas hienerał-major Alaksandar Pašukievič, jaki kiravaŭ VPS i vojskami SPA Paŭnočna-zachodniaha aperatyŭna-taktyčnaha kamandavańnia. Hienerała nazyvajuć čarhovaj achviaraj «švedzkaha desantu» paśla vyzvaleńnia ŭ lipieni ad pasadaŭ staršyni Dziaržpamiežkamitetu Ihara Račkoŭskaha i kamandujučaha VPS i vojskami SPA Dźmitryja Pachmiełkina.
