Da 1 listapada ŭłaśnik homielskaha handlovaha centra «Sakret» pavinien urehulavać prablemnyja pytańni z pradprymalnikami, jakija tam pracujuć.Hetaje rašeńnie było pryniata 23 kastryčnika na naradzie ŭ Homielskim abłvykankamie, što prajšła z udziełam pradstaŭnikoŭ vykanaŭčaj ułady, ułaśnika HC i pradprymalnikaŭ dla dasudovaha ŭrehulavańnia kanfliktu.
5 kastryčnika ŭ HC «Sakret» źjaviŭsia novy ŭłaśnik, jaki ŭźniaŭ arendnuju płatu z 45 da 120 jeŭra za kvadratny mietr i prapanavaŭ da padpisańnia novyja dahavory ź nieprymalnymi dla pradprymalnikaŭ umovami.U handlovym centry pracujuć pryblizna 400 pradprymalnikaŭ. 23 kastryčnika pradprymalniki nie adkryli svaje handlovyja punkty, paviesiŭšy abjavy «Sandzień» i «Pieraŭlik», i praviali schod. Jany pieradali ŭ milicyju kalektyŭnuju adozvu pra mahčymaje machlarstva z boku novaha ŭłaśnika.
Načalnik adździeła pradprymalnictva kamiteta ekanomiki Homielskaha abłvykankama Maryna Kryvuń paviedamiła, što źmiena ŭłaśnika ŭ handlovym centry zhodna z Hramadzianskim kodeksam nie ciahnie źmieny arendnych adnosinaŭ dla arandataraŭ.«Kupla hetaha centra nijakim čynam nie mianiała b umovy arendy dla pradprymalnikaŭ, kali b nie adno: na momant kupli HC jany ŭsie ŭ dobraachvotnym paradku padpisali pahadnieńni ab skasavańni raniej dziejnaha dahavoru arendy. U pryncypie, heta i spravakavała mahčymaść novaha ŭłaśnika prapanavać umovy arendy z arendnaj staŭkaj, jakaja ŭ dva i bolš razy pieravyšaje raniej dziejnuju», — skazała načalnik adździeła.
Pradprymalniki ž śćviardžajuć, što jany skasavali dahavor, tamu što ich padmanuli, kiraŭnictva centra złoŭžyło ich davieram.
Pavodle słoŭ Kryvuń, jana raniej dała ŭsim pradprymalnikam rekamiendacyi napisać na adras novaha ŭłaśnika zajavy pra žadańnie praciahnuć dahavornyja adnosiny na raniejšych umovach, hetyja listy ŭžo atrymany ŭłaśnikam, «što pry sudovym razbory budzie źjaŭlacca volevyjaŭleńniem pradprymalnikaŭ i razhladacca jak ich žadańnie zaklučyć dahavornyja adnosiny na raniejšych umovach».
Jana nahadała, što miascovyja orhany ŭłady nikoli nie ŭmiešvalisia ŭ dziejnaść subjektaŭ haspadarańnia, ale ŭ hetaj situacyi dva baki nie zdoleli damovicca.Abłvykankam užo nieadnarazova pravodziŭ sustrečy z ułaśnikam i pradprymalnikami, ale «znoŭ dva baki stali nie na šlach vyrašeńnia kanfliktu, a na šlach eskałacyi».
«Situacyju my kantralujem pastajanna. Učora my ŭłaśniku jasna dali zrazumieć, što niama padstaŭ dla ŭźnimańnia arendnaj płaty», — padkreśliła Kryvuń.
Kali da 1 listapada ŭłaśnik i pradprymalniki nie damoviacca, kanfliktnuju situacyju budzie vyrašać haspadarčy sud.
«Biezumoŭna, my budziem vyrašać situacyju, nichto nie daść ułaśniku samavolničać. Svaich pradprymalnikaŭ my nie kiniem», — padsumavała načalnik adździeła.
