Stanisłava Husakova i Aleś Krot.
Jaje vinavaciać va ŭdziele ŭ niesankcyjanavanaj akcyi i vykarystańni niezarehistravanaj symboliki. Husakovu zatrymali ŭ subotu paśla akcyi pa ŭšanavańni pamiaci paŭstancaŭ Kastusia Kalinoŭskaha. Zatrymanych razam Alesia Krata ź Miensku, Vitala Ašurku ź Biarozaŭki Lidzkaha rajonu i Vitala Łopasava z Horadni buduć sudzić 30 kastryčnika.
Sud nad udzielnikami akcyi pa ŭšanavańni pamiaci paŭstancaŭ Kalinoŭskaha ŭ Śvisłačy pačaŭsia tolki paśla abiedu. Usie, kaho zatrymali ŭ subotu, akramia Vitala Łopasava z Horadni, znachodzilisia da sudu ŭ śvisłackim śledčym izalatary.
U subotu Łopasava adpuścili damoŭ — jak jon sam skazaŭ «Svabodzie», jon paprasiŭsia ŭ milicyjantaŭ, bo ź im razam byŭ niepaŭnaletni syn. U paniadziełak jon źjaviŭsia ŭ sud.
Stanisłava Husakova, jakuju sudzili siońnia, skazała «Svabodzie», što jaje vinavaciać u parušeńni praviłaŭ praviadzieńnia masavych mierapryjemstvaŭ. Jana trymała ŭ rukach bieł-čyrvona-bieły ściah, jaki sama pašyła doma. I voś za vykarystańnie niezarehistravanaj symboliki jaje i sudzili.
Śviedčyli suprać jaje tolki milicyjanty, ź jejnaha boku śviedak nie było. Sud zaciahnuŭsia, bo spačatku čakali śviedak, a potym šmat času pajšło na prahlad videamateryjału.
Paśla prysudu ja nahadaŭ Stanisłavie słovy, jakija jana skazała ŭ interviju našamu radyjo ŭ subotu padčas akcyi — što, maŭlaŭ, jejny los daŭno źviazany z Kalinoŭskim, bo za ŭdzieł u paŭstańni 1863 hodu na vysyłku trapiŭ jejny praprapradzied. Ja zapytaŭsia, ci adčuła jana za hetyja dni nasamreč svaju suviaź ź imiem Kastusia Kalinoŭskaha?
Husakova: «Ja pra heta ŭžo dumała raniej. Bo pierš čym pajechała i advučyłasia pa prahramie Kalinoŭskaha, pierad hetym adsiedzieła ŭ Žodzinie 12 sutak za ŭdzieł u Płoščy. Dziŭnaje hetaje proźvišča… Ciapier budu siadzieć u chacie i čakać naračonaha z takim proźviščam, a nie prapadać niedzie pa IVS-ach».
Aleś Krot ź Miensku, jakoha zatrymali razam z Husakovaj, pierakanany, što i zatrymańnie, i sud nad imi — niezakonnyja, bo nijakaha pikietavańnia i mitynhu nie było.
Krot: «I jašče nas vinavaciać, što trymali ŭ rukach niezarehistravanuju symboliku. Nu jak možna kazać pra bieł-čyrvona-bieły ściah jak pra niezarehistravanuju symboliku, kali ŭ 1991–95 hadach jon byŭ našym dziaržaŭnym ściaham?Vidavočna, što heta hłupstva poŭnaje, a stvoranaje dziela taho, kab „zakryć“ aktyŭnych biełarusaŭ, jakija nie zabyvajucca na svaju historyju. Zrazumieła, što heta zahad źvierchu».
Jašče Stanisłava Husakova apaviała, u jakich umovach jany z suboty siadzieli ŭ Śvisłackim SIZA:
«Naahuł, było strašenna chałodna, u budynku niama kanalizacyi, dva razy na dzień nas vyvodzili ŭ prybiralniu na vulicy i pravodzili da ŭmyvalnika. Ale byŭ vielmi ludzki persanał, jany imknulisia ŭsiakim čynam niveliravać sytuacyju: dali koŭdry i prynosili haračuju vadu».
Maładych ludziej zatrymali ŭ Śvisłačy ŭ subotu padčas akcyi, jakaja mieła na mecie ŭšanavać pamiać paŭstancaŭ Kalinoŭskaha 1863 hodu. Usich, za vyklučeńniem Łopasava, pakinuli da sudu ŭ pastarunku.
Ašurku i Łopasava zatrymali ŭ Śvisłačy, kali jany ź siabrami nakiroŭvalisia da svajho aŭtamabila, kab jechać u Jakušoŭku. Krata i Husakovu zatrymali, kali jany ŭžo ź Jakušoŭki viartalisia ŭ Śvisłač. Pa darozie ich mašynu spyniła DAI, i pradstaŭniki miascovaha RAUS zapatrabavali, kab jany prajechali ź imi ŭ pastarunak.
