Viarchoŭny pradstaŭnik ES pa źniešniaj palitycy i palitycy biaśpieki Ketryn Eštan vitała dałučeńnie vaśmi krain Jeŭropy da rašeńnia Jeŭrasajuza pradoŭžyć sankcyi ŭ dačynieńni da Biełarusi da 31 kastryčnika 2013 hoda.
«Jeŭrapiejski sajuz prymaje da viedama i vitaje rašeńni hetych dziaržaŭ», — havorycca ŭ zajavie viarchoŭnaha pradstaŭnika ES, tekst jakoha pastupiŭ u RIA Novosti (aficyjna dakumient pakul nie apublikavany).
Krainy, što dałučylisia, — Ałbanija, Isłandyja, Lichtenštejn, Makiedonija, Narviehija, Sierbija, Charvatyja i Čarnahoryja.
Varta adznačyć, što ŭsie hetyja krainy, akramia Narviehii, zajavili pra svajo dałučeńnie da sankcyj ES u dačynieńni da Biełarusi jašče ŭ červieni 2012 hoda.
15 kastryčnika Saviet ministraŭ zamiežnych spraŭ krain ES pryniaŭ rašeńnie pradoŭžyć sankcyi da 31 kastryčnika 2013 hoda ŭ suviazi z tym, što «nie ŭsie palitźniavolenyja byli vyzvaleny, a vyzvalenyja nie byli reabilitavany, a taksama z pryčyny adsutnaści palapšeńniaŭ u śfiery pavažańnia pravoŭ čałavieka, viaršenstva zakonu i demakratyčnych pryncypaŭ».
Pry hetym Saviet ES padkreśliŭ svaju prychilnaść raźvivać adnosiny ź biełaruskim narodam i hramadzianskaj supolnaściu, u tym liku praź inicyjatyvu «Jeŭrapiejski dyjałoh ab madernizacyi».
Pad vizavyja i ekanamičnyja sankcyi ES traplajuć 243 biełaruskija čynoŭniki, u tym liku Alaksandr Łukašenka.