Pa stanie na 2 listapada 2012 hoda razhledžana pytańnie prymianieńnia amnistyi ŭ dačynieńni da 14.019 asudžanych (usiaho padpadajuć pad amnistyju 15.059 čałaviek), jakija ŭtrymlivajucca ŭ miescach pazbaŭleńnia voli. Pra heta paviedamili ŭ MUS Biełarusi.
Načalnikami papraŭčych ustanoŭ zakrytaha typu vyniesieny pastanovy ab vyzvaleńni ad dalejšaha adbyvańnia pakarańnia 2.630 asudžanych.
Pryniata rašeńnie ab skaračeńni terminu pakarańnia na adzin hod u dačynieńni da 5.256 asudžanych.
Admoŭlena ŭ prymianieńni amnistyi 6.133 asudžanym.
Aprača asob, jakija ŭtrymlivajucca pad vartaj, zakon Respubliki Biełaruś «Ab amnistyi niekatorych katehoryj asob, jakija ŭčynili złačynstvy» ad 9 lipienia 2012 hoda raspaŭsiudžvajecca na asudžanych, da jakich prymieniena pakarańnie, nie źviazanaje z pazbaŭleńniem voli. Z takoj katehoryi pad amnistyju padpadajuć bolš jak 7,5 tysiačy čałaviek. Pa stanie na 1 listapada 4.842 asudžanyja vyzvaleny ad dalejšaha adbyvańnia pakarańnia, 1.957 termin skaročany na 1 hod.
Zakon utrymlivaje pieralik asob, na jakich dziejańnie amnistyi nie raspaŭsiudžvajecca. Siarod inšych asudžanyja, jakija ŭchilajucca ad adbyvańnia pakarańnia, abjaŭlenyja ŭ vyšuk, złosnyja parušalniki režymu, jakija nie pahasili ŭron, a taksama tyja, da kaho na praciahu 2005–2012 hadoŭ amnistyja abo pamiłavańnie ŭžo prymianialisia, ale jakija znoŭ učynili naŭmysnaje złačynstva ŭ pieryjad niaźniataj abo niepahašanaj sudzimaści.
Nahadajem, zakon ab amnistyi ŭstupiŭ u siłu 11 lipienia. Jon pavinien być vykanany na praciahu šaści miesiacaŭ z dnia aficyjnaha apublikavańnia.
Pry realizacyi zakona z papraŭčych ustanoŭ zakrytaha typu mierkavałasia vyzvalić prykładna 2.180 źniavolenych, z papraŭčych ustanoŭ adkrytaha typu — kala 700.
